Афанасий Васильевич Ноговицын 1929 с. олунньу 3 күнүгэр 1 Одуну нэһилиэгэр аатырар-сураҕырар Харыйалаах алааһыгар төрөөбүтэ. Аҕата Василий Михайлович (Томолло Баһылай) Харыйалаах олохтооҕо, ийэтэ Анна Лукинична Михайлова Чурапчы оройуонун Хадаар нэһилиэгиттэн төрүттээх.
Бииргэ төрөөбүт алтыалар, үс убайа Аҕа дойду Улуу сэриитин хонуутугар сураҕа суох сүппүттэрэ (Иван, Роман, Ананий). Эдьиийэ Анна, быраата Василий Бэрдьигэстээх нэһилиэгэр ыал буолан олохсуйан олорбуттара.
Афанасий онус кылааһы бүтэрэн баран, сэрии кэнниттэн үөрэнэргэ усулуобуйа суох буолан, Ворошилов аатынан холкуоска үс сыл кадровай булчутунан, биригэдьииринэн, суотчутунан үлэлээбитэ. 1953-1956 сс. Дьокуускайга холкуос оскуолатыгар, ону кытта тэҥҥэ 1955 с. ДОСААФ-ка радиотелефонист кууруһугар үөрэнэр. Ол кэнниттэн төрөөбүт дойдутугар төннөн кэлэн, Улуу Сыһыыга биригэдьииринэн ананан үлэлиир. Сахалыы мындыр өйдөөх-санаалаах, тэрийэр-салайар талааннаах, айылҕаттан бэриллибит дьоҕурдаах, уопсай дьыаланы өрө тутар уратылаах киһини таба көрөн, холкуос бэрэссэдээтэлинэн талбыттара. Онтон Одуну отделениетын бастакы управляющайа буолар. Бу ыарахан, дьаныардаах үлэҕэ 17 сыл эҥкилэ суох үлэлээбитэ. Нэһилиэк социальнай- экономическай сайдыытыгар үгүс кылаатын киллэрсибитэ.
Афанасий Васильевич булка олус чугас, наһаа байанайдаах, сырыыны, айаны кыайар киһи этэ дииллэр. Ахсым аты миинэрин сөбүлүүр эбит, ол эрэн акка улаханнык оһоллонон, доруобуйатын туругунан салайар үлэттэн уурайан, 1974 сыллаахтан эт-үүт комбинатыгар приемщигынан, сопхуоска бухгалтерынан үлэлээбит.
1984 с. бочуоттаах сынньалаҥҥа барар. Ол да буоллар олорон хаалбакка, кыаҕа баарынан сопхуоска, дьоҥҥо-сэргэҕэ уһанан туһалыыра. Сайынын уһанар дьиэтигэр күнү-күннүктээн олорон, кыраабыл, сүгэ, хотуур уга оҥороро.
Афанасий Васильевиһы дьону өйдүүр – өйүүр, кытаанах, ирдэбиллээх, талааннаах салайааччы быһыытынан ахталлар. Үөлээннээхтэрэ ыалдьыбатаҕа уонна аныгы үйэҕэ төрөөбүтэ буоллар, ыраахха тиийбит салайааччы буолуо этэ диэн этэллэр. Таһаарыылаах салайааччы, дьону түмэ тардар дьоҕура айылҕаттан анаммыт анала буоллаҕа...
1970 с. «Килбиэннээх үлэтин иһин» В.И.Ленин төрөөбүтэ 100 сыла туолуутун бэлиэтигэр» юбилейнай мэтээлинэн, 1971 с. «Бочуот знага» уордьанынан наҕараадаланар. 1992 с. ССРС Үрдүкү Сэбиэтин «1941-1945 сс. Аҕа дойду Улуу сэриитин кэмигэр килбиэннээх үлэтин иһин» мэтээлинэн бэлиэтэммитэ. Маны таһынан олус элбэх Махтал суруктар, Грамоталар кини үтүө суобастаах үлэтин туоһулууллар.
1953 с. олоҕун аргыһын Елизавета Ивановна Скрыбыкинаны көрсөн, 45 сыл эйэ-дэмнээхтик ыал буолан олороллор. Аҕа ууһун ааттатар, олохторун салгыыр икки уол оҕолоноллор: Роман, Афанасий.
Афанасий Васильевич 1996 с. ыарахан ыарыыттан күн сириттэн барбыта.
