Мин Аҕа дойдуну көмүскүүр Улуу сэрии саҕаламмыта иккис сылыгар күн сирин көрбүтүм. Аҕабыт Никитин Василий Иннокентьевич, партия чилиэнэ, СССР журналистарын Союһун чилиэнэ, адвокат,  сэрии бириэмэтигэр партия обкомун дьаһалынан радиокомитет уполномоченнайынан, "Социалистическая Якутия" хаһыат Таатта, Чурапчы оройуоннарыгар бэйэтин корреспонденынан ананан үлэлээбитэ. Сэрии бириэмэтигэр тыылга хаалан бэйэлэрин харыстаммакка  күүрээннээхтик үлэлээбит оройуон дьонун дьылҕатын  кырдьыгынан сырдатар ыстатыйалары суруйбута история чахчыта буолан хаһыат саһарбыт лиистэриттэн кэпсии сыттаҕа. Ийэбит Копырина Мария Тихоновна Уус Алдан Өнөр нэһилиэгэр сэрии бириэмэтигэр ыанньыксыттаан, үлэ ыараханын көрсүбүтэ.  Сэрии кэмин оҕолоро буоламмыт улахан дьону кытта оттоһон, сүөһү көрөн, мас сааһылаан, кирпиичэ үктээн улааппыппыт. Үөрэхпитигэр кыһаллан үөрэнэрбит. Биһиги Нам орто.оскуолатын 1962 с.10 "а" кылаас оҕолоро "Оскуола-производство-үрдүк үөрэх" диэн республикаҕа бастакыннан ыҥырыы таһааран Модут учаастагар үлэлии тахсыбыппыт. Миэхэ 25 ынах тиксибитэ. Барыта илии үлэтэ этэ, от киллэрэрбит, ынахтары илииннэн ыырбыт,ноһуом таһаарарбыт, онон хотоҥҥо сарсыардаттан киэһээҥҥэ диэри сылдьарбыт.Миигин кыбартаал аайы үрдүк көрдөрүүлээх ыамы ситиспитим иһин, общественнай үлэҕэ мэлдьи көхтөөхтүк кыттарым иһин холхуос хомсомуолун кэмитиэтин босхоломмут сэкирэтээринэн талбыттара. 1963 с.тохсунньу ыйга Нам оройуонун киинигэр буолбут хомсомуол конференциятыгар хомсомуол кэмитиэтин чилиэнинэн талбыттара. Аны аҕыйах ыйынан Хатырык нэһилиэгин сэбиэтин депутатынан быыбардаммытым. Онтон ыла нэһилиэнньэни кытары үлэлиир, дьон-сэргэ олоҕун-дьаһаҕын тэрийэр, күннээҕи кыһалҕаларын улахан мунньахтарга туруорсар эппиэтинэстээх эбээһинэстэммитим.1965 с.ССКП чилиэнинэн ылбыттара. СГУ историко-филологическай факультетын бүтэрбитим.40 сыл Эдьигээн оройуонугар, кэргэмминээн Сергеев Гаврил Софроновичтыын таһаарыылаахтык үлэлээбиппит, педагогическай үлэ бэтэрээннэрэбит.Үөрэнэр кэммиттэн фольклор матырыйаалларын хомуйан саҕалаабытым.Манчаары Баһылай икки үйэ аннараа өттүгэр Түбэ нэһилиэгэр сылдьыбытын үөрэппитим, элбэх ыстатыйалары бэчээттэппитим.Аатырбыт олоҥхоһут Прокопий Ядрихинскай-Бэдьээлэ тыыннааҕар утары көрсөн олорон кэпсэппит, сэһэргэспит айымньыларын ырыппыт тыыннаах туоһулартан биирдэстэрэ буолабын. Аҕам Никитин В.И., Бэдьээлэ тылыттан сурукка тиспит олоҥхолоро "Ходуһа уһуктуута"  (1964) диэн олоҥхоһут бастакы кинигэтигэр киирбиттэрэ'