Капустина Мария Захаровна
(01.04.1936с. - 17.09.2007с.)
Биһиги күн-күбэй ийэбит Капустина Мария Захаровна - Үлэ бэтэрээнэ, Улуу сэрии бэтэрээнин огдообото, "Материнская слава" II, III степеннээх орден кавалера. Ийэбит 1936 сыллаахха муус устар 1 кунугэр Боруллуо Антуон дьиэ кэргэнигэр бүтэһик сэттис оҕоннон төрөөбүт. Олохторо Ньурба улууһун Киирэп нэһилиэгэр.
Ол кэмҥэ, дойду үрдүнэн оҕо дьиэлэрин тэрийэннэр, Күндээдэ Араҥастааҕар эмиэ аhыллар. Эһэбит икки хараҕа суох буолан кыра кыыстарын оҕо дьиэтигэр ииттэрэ биэрбиттэр. Онон ийэбит оҕо дьиэлэринэн улааппыт: бастаан Күндээдэ Араҥастааҕар, кэлин Куочайга. Кини оонньооботох оҕо саастаах, дьоллоох оҕо саас диэни билбэккэ улааппыт, олох аһыытын-ньулуунун, үлэ кытаанаҕын билбит киһи.
Улуу сэрии са5аланарыгар ийэбит 5 саастаах этэ. Ол ыар сыллар келуенэтин о5олорун курдук, улахан дьону кытары бииргэ араас улэ5э улэлээн кэлбит. От, мас, бурдук, хотон үлэтигэр, баржа грузтааhыныгар, сүөккэhинигэр игин.
7 кылаастаах оскуоланы бүтэрэн баран, Дьокуускайга үлэ-үөрэх көрдөһө барбыт. Үөрэнэ сылдьан, аҕабытын, Улуу сэрии кыттыылаа5ын, Капустин Василий Петровиhы көрсөн 1957 сыллаахха ыал буолбуттар. Дьокуускай куоракка 1957 сыллаахха ахсынньы ыйга улахан уол Александр, 1959 сыллаахха ахсынньы ыйга мин - иккис уол Петр төрөөбүппүт.
1960 сыллаахха Ленинскэй (Ньурба) оройуонун Маар сэлиэнньэтигэр профтехучилище тэриллэн директорынан Платон Иванович Харитонов, трактористар группаларын маастарынан биhиги аҕабыт Василий Петрович Капустин анананнар үлэлии тиийбиттэр. Аҕабыт саҥа дьыл саҕана Т-74 диэн гусеничнай тракторынан сэттэ анаар суукка айаннаан, икки буолан солбуһан ыытан Маарга тиийбиттэр. Маарга көһөн кэлэн баран дьоммут өссө 5 кыыс, 2 уол оҕолоноллор.
Ийэбит бастаан училище остолубуойугар поварынан, онтон общежитияҕа коменданынан, кэлин үөрэнэр корпуска уборщицанан үлэлээбитэ.
Мин армияҕа сырыттахпына, 1979 сыллаахха сайын аҕабыт ууга былдьанан суох буолбута. Оччолорго ийэбит саамай кыра балтыбытынан хат сылдьыбыта, онон мурун бүөтэ балтыбыт аҕатын көрбөтөх оҕо – 3 ый буолан баран төрөөбүтэ. Онон ийэбит соҕотоҕун 8 о5ону көрөн-харайан, иитэн, үөрэхтээн улаатыннарбыта. Пенсияҕа тахсан баран хойукка дылы үлэтиттэн уурайбатаҕа.
Ийэбит күһүөрү тэллэй үүннэҕинэ тэллэйдээн, тууһаан-тумалаан, Ньурба дьаарбанкатыгар тиийэ атыылыыра. Ийэбит суох буолбутун кэннэ, хойукка дылы дьоннор кини астаабыт тэллэйдэрин ыйыталлара.
Балтыларым кыраларыгар, барыларыгар таҥас тигэн таҥыннарара. Элбэх оҕо таҥаһа-саба ол курдук элбэх сыраны эрэйэрэ буолуохтаах.
Ийэбит уруккуттан сүөһү ииттэр баҕалаах буолара. Ол баҕатын саҥа дьиэ туппутум кэннэ толорбута. Киэн уһаайбаҕа хотон туттан сүөһү ииттэн барбыппыт. Сүөһүбүт ахсаанын 20-чэҕэ дылы улаатыннарбыппыт. Ньурбаннан, Дьокуускайынан сиэннэригэр, оҕолоругар эт, ис, сүөгэй, суорат, үүт мэлдьи ыыта олороро. Кымыстаан эмиэ сиэннэригэр иһэрдэрэ, ордугун атыылаан эбинэр этибит. Ийэбит суох буолбутун кэннэ сүөһү иитиитин тохтоппутум. Билигин наар сылгы ииттэбин.
Ийэбит кыргыттарын таҥас тигиитигэр, баайыыга үөрэппитэ. Билигин бары иистэнэллэр, баайаллар. Бэрт кыраларыгар сир аһын хомууругар илдьэ сылдьан үөрэппитэ. Ас астааһыныгар эмиэ кыраларыттан үөрэппитэ.
Үтүө, муударай өйдөөх, күүстээх санаалаах, ыраас дууһалаах, аһыныгас сүрэхтээх, тоҥмуту ириэрэр, аччыктаабыты аһатар, ыарахантан толлубат, айылҕаттан талааннаах – ити барыта биһиги күн-күбэй Ийэбит!
Ийэбит 2007 сыл атырдьах ыйын 17 кунугэр бу кун сириттэн барбыта. Кини 15 сиэн тапталлаах эбээлэрэ этэ. Билигин кини аатын сиэннэрэ, хос сиэннэрэ ааттаталлар. Дьокуускайга, Хатаска, Миирнэйгэ, Ньурба5а, Маарга, Бүлүүгэ олороллор.
Ахтыыны суруйда төрөппүт уола Петр Васильевич Капустин - Үлэ бэтэрээнэ.
