Христина Николаевна Павлова ахтыыта

Таайбыт Ньукулай 1926 сыллаахха Муоһай диэн сиргэ төрөөбүт буолуохтаах. Ийэтэ Агафья Васильевна, аҕата Георгий Николаевич Никифоров диэн биэс оҕолоох ыалга иккис оҕоннон күн сирин көрбүт.

Ньукулай сымнаҕас майгылаах, туруу үлэһит, дьоҥҥо барытыгар көмө-ама буолара. Өр кэмҥэ тырахтарыыһынан, механигынан, моториһынан үтүө суобастаахтык үлэлээбит. Ол саҕана кинини кытта алтыспыт дьоннор Ньукулайы улахан билиилээх, дэгиттэр киһи этэ диэн ахталлар.

Ньукулай олус сэмэй, аа-дьуо сылдьан барыбыт туһугар кыһалларын өйдүүбүт. Ордук биһиги ийэбит туһугар олус долгуйааччы, наар кэлэн көмөлөһөн, сүбэлээн барара. Оннооҕор аармыйаҕа сылдьан суругун кытта харчы суулаан ыытар этэ диэн ийэм кэпсиир буолара.

Таайбыт оҕоҕо наһаа сымнаҕас, эйэҕэс этэ, остуол баһыгар дермантин бүрүөһүннээх кириэһилэлээх буолааччы, сороҕор сакалааттаһан хотторбута буолан онно олордон аһатара уонна наар бөһүүкэлээн сиэтэрин өйдүүбүн.

Сайын быыс булан Унаардаах Бэрэтигэр туулаан солуурчахха балык тутан киирээччи, кэлин уолун Андрейы уонна бырааппытын Бүөтүрү  тууннан балыктыырга үөрэппитэ.  

Миигин бэйэтин оҕотун курдук иитиһэн Николаевна дэппит.

Улахан Уолум Сергей атаҕар кутургуйа тахсан хас да ый балыыһаҕа сыппыппыт, бааһа хахтанар эрэ уонна оспот этэ, Кыһыл Сырга киирэн снимоктаппыппыт онно дьөлөҕөһө уҥуоҕар тиийэн эрэр диэбиттэрэ, маайга сынньана Хампабытыгар тахсыбыппыт, ол киэһэ таай кэлэн, хайдах да кутургуйа буолбатах, былыргыннан “ытык ыарыы буолбут сибилигин Кыдана Васильевнаҕа барыҥ, кини оннук ыалддьа сылдьыбыта, ол хаанынан бистэриҥ, былыр оннук эмтээччилэр” диэбитэ. Сол күн Кыдана Васильевнаҕа баран тарбаҕыттан хаан таһааран оҕобут бааһыгар куттарбыппыт. Онтон өр буолбакка уолбут атаҕа үчүгэй буолбута. Таайбыт барахсан сылдьааран ол туһунан толкуйдуу сылдьыбыт эбит. Онон таайбытыгар уонна Кыдана Васильевнаҕа махталбыт муҥура суох!

Балта Никифорова Христина Григорьевна

Быраата Никифоров Василий Григорьевич