Федорова Клара Семеновна от ыйын 16 күнүгэр, 1939 сыллаахха Лиэнинскэй оройуонун Ньурба бөһүөлэгэр Федоровтар дьиэ кэргэттэригэр үһүс оҕонон төрөөбүтэ.

Оҕо эрдэҕиттэн үлэни өрө тутан, хайдахтаах да үлэттэн толлубакка улааппыта. Төрөппүт аҕата, Федоров Семен Михайлович, икки саастааҕар өлбүтэ, ийэтэ, Федорова Дария Николаевна үс оҕолоох огдообо хаалбыта.

Ынахтаах-сүөһүлээх буолан аччык дьылы чэпчэкитик аһардыбыттара. Сайынын оттоон, күһүнүн-сааһын мастаан, кыһынын муустаан үлэ ыараханын этинэн-хаанынан билбитэ.  Оскуолаҕа үөрэнэр кэмигэр ордук математика, физика уруоктарын сөбүлүүр этэ. Оскуоланы бүтэрэн баран лаборант идэтин баһылаабыта. Идэтинэн кылгас кэмҥэ эрэ үлэлээбитэ. Ол кэннэ бочуоттаах сынньалаҥҥа тахсыар диэри Пионер дьиэтигэр, Үөрэҕирии салалтатыгар дьиэ сууйааччынан үлэлээбитэ.

Үлэтигэр мэлдьи хайҕабылга сылдьыбыта, элбэх грамоталаах, махтал суруктардаах. 1991 с. балаҕан ыйын 30 күнүгэр ЯАССР «Үлэ бэтэрээнэ» мэдээлинэн наҕараадаламмыта.

1995 сыл сэтинньи 10 күнүгэр бочуоттаах сынньалаҥҥа барбыта. 1999 сыл сэтинньи 30 күнүгэр РФ «Үлэ бэтэрээнэ» аат иҥэриллибитэ.

Икки кыыстаах, үс сиэннээх, икки хос сиэннээх.

2009 сыллаахха ахсынньы 10 күнүгэр уһун ыарахан ыарыыттан 70 сааһыгар өлбүтэ.

Клара Семеновна олус сэмэй, үтүө майгылаах, дьээбэлээх киһи этэ. Кини иллэҥ кэмигэр баайарын, дьэрэкээн оҥоһуктары оҥорорун ордороро. Дьүөгэлэрэ, бииргэ үлэлиир үөлээннээхтэрэ кини дьээбэтин сөбүлүүллэрэ. Мэлдьи итии чэйдээх, остуола толору астаах, куруук ыалдьыттаах саха далбара этэ.

Кыргыттарын бэйэтин холобурунан киһи киһитэ буолун диэн ииппитэ.