Ольга Петровна 6-с оҕото, ийэтин аатын ылбыт Ольга Петровна тохсунньу 1 күнүгэр 1930 сыллаахха Лээги нэhилиэгэр, аакка киирбит кэрэ айылҕалаах, балыктаах, бултаах-алтаах Мундуруччу үрэҕин төрдүгэр төрөөбүтэ. Лээги нэhилиэгэ Мундуруччу төрдүттэн 9 көс ыраах сытар буолан кэлэрэ-барара да кыайтарбакка, убайдара сэриигэ бараннар уонна огдообо ийэтигэр көмөлөһөөрү, бастакы кылаас кэнниттэн салгыы үөрэммэтэх.
Ольга баара суоҕа 12 сааhыттан, сэрии ыар сылларыгар, колхуос ыарахан үлэтигэр ыанньыксытынан үлэтин саҕалаан үлэлээбитинэн барар. Колхуостар бөдөҥсүйүүлэригэр Лээгигэ көһөн киирэн, кырымахтаах хара саhылы иитиигэ үлэлии сылдьан, үрдүк көрдөрүүлэрин иhин, 1953 сыллаахха норуот хаhаайыстыбатын бастыҥнарын Бүтүн Сойуустааҕы быыстапкатыгар Москваҕа кыттар чиэскэ тиксибитэ. Оччолорго итинник улахан чиэс мээнэ киhиэхэ тиксибэт этэ. Ону туоhулуур, Бүтүн Сойуустааҕы тыа хаhаайыстыбатын кыттыылааҕа мэтээл уонна сибидиэтилистибэ.1953 сыллаахха, Лээгигэ электростанцияҕа, бастакы Ильич уотун киллэрээри, үлэлии кэлбит эдэр специалист уолу, аҕабытын, Федотов Еремей Максимовиhы кытта билсэн, кэргэн тахсан, ыал буолаллар. Үлэни оро тутан, үлэҕэ сыстыгас буолан Амма совхозка уопсайа 26 сылтан ордук араас үлэҕэ барытыгар улэлиир. Ольга Петровна кэргэнинээн, совхоз сүөһүтун көрөн, от оттоон Лээгиттэн тэйиччи учаастактарга олорон үлэлиир этилэр, оҕолор интернакка олорон үөрэнэллэрэ. 1969 сылга Лээги нэhилиэгин иккис 2-с Чакыр нэhилиэгэр көһөрүү саҕаланар. Ольга Петровна Чакырга көһөн кэлэн совхозка, онтон сельсоветка, детсадка техүлэhитинэн үлэлиир. 1973 сылтан пенсияҕа тахсыар диэри, пенсияҕа тахсан да баран, 1986 сылга дылы Амма райпотугар, Чакыр маҕаhыыныгар техүлэhитинэн үлэлиир, потребительскай кооперация ветерана буолар.
Ольга Петровна олус сайаҕас, сытыары сымнаҕас майгылаах, ыалдьытымсах, аhыныгас дууhалаах, дьоҥҥо үтүөну-кэрэни эрэ баҕарар, киэн көҕүстээх киhи этэ. Дьиэҕэ киирбит киhини чэйдэппэккэ таhаарбат этэ. Тулаайах хаалбыт аймахтарын оҕолоро улааталларыгар, үлэhит буолалларыгар көмө-тирэх буолбута. Бары убаастаан, кырдьаҕас эдьиийбит барахсан, диэн ааттыыллара.
Еремей Максимович, алтынньы 25 күнүгэр 2007 сыллаахха, 77 сааhыгар, ыалдьан олохтон туораабыта. Ольга Петровна, кэргэнин кэнниттэн 7 сыл буолан баран доруобуйата мөлтөөн 84 сааhыгар орто дойдуттан барбыта. Кинилэр 54 сыл бииргэ эйэ-дэмнээхтик олорон, 4 оҕону торотон, 9 сиэннэнэн, 15 хос сиэннэнэн, биhигини барыбытын үөрэхтээх, үлэhит дьон оҥортоон, сиэннэрин биэбэйдэhэн, улаатыннаран, толору дьоллоох олоҕу олорон аастылар.
Оҕолоро:
Максимов Владимир Еремеевич, 22.01.1954. Владимир Амма орто оскуолатын бүтэрэн баран, 1976 с. Өлүөхүмэтээҕи механизация уонна электрификация техникумун бүтэрэн, техник-электрик идэтин ылбыта. Ол бүтэриэҕиттэн пенсияҕа тахсыар диэри биир да сири халбарыйбакка Амматааҕы РЭС тэрилтэтигэр үлэлээн кэллэ. Үлэ уонна энергетика ветерана.
Амма нэһилиэгин бочуоттаах олохтооҕо, кэргэнэ Кириллина Мария Лариновна, 2 :ҕ:лоохтор: Владимир, Наталья, иккиэн үрдүк үөрэхтээхтэр. 1 сиэннээхтэр.
Федотов Руслан Еремеевич, 04.12.1956, 1974 сыллаахха Амма орто оскуолатын бүтэрбитэ. 1979 с Амма сопхуоска биригэдьииринэн ананан үлэлиир. Эдэр кэскиллээх үлэһити Өлүөхүмэтээҕи тыа хаһаайыстыбатын техникумугар салайар кадрдары үөрэтэр отделениетыгар үөрэххэ ыыталлар. 1982 сылтан 1998 сылга диэри Амма сопхуоска механигынан, техника ремоннуур мастерскойга сэбиэдиссэйинэн, старшай биригэдьииринэн, инженерынан, кылаабынай инженерынан үлэлиир. Олохпут тутула уларыйан 1998 сылтан урбаанньыт буолан регистрацияланан үлэтин саҕалыыр. Билигин республикаҕа биллэр урбаанньыт буолан үлэтин киэҥ хайысхалаахтык торумнаахтык үлэлии сылдьар. Республикаҕа тыа хаһаайыстыбанан дьарыктанар тэрилтэлэргэ саппаас чааһынан, техниканан, сиэмэ бурдугунан хааччыйар. Дьокуускай куоракка, Аллараа-Бэстээххэ, Аммаҕа, Чурапчыга, Үөһээ-Бүлүүгэ атыы-эргин кииннэрдээх.
Саха сирин тыатын хаһаайыстыбатын үтүөлээх үлэһитэ, туйгуна, «Ил түмэн» Судаарыстыбаннай мунньах депутата, Амма улууһун бочуоттаах олохтооҕо, Амма улууһун бочуоттаах мецената. 2 оҕолоох: Вера, Любовь, иккиэн үрдүк үөрэхтээхтэр, 4 сиэннээх.
Куприянова Людмила Еремеевна, 22.04.1958, 1975 сыллаахха Амма орто оскуолатын бүтэрэр. 1975 сылтан 2004 сылга диэри Холбос систематыгар Амма райпотугар продавецтан саҕалаан председатель солбуйааччытыгар тиийэ, барыта холбоон 29 сыл үлэлиир. 1989 сылга Дьокуускайдааҕы кооперативнай техникуму туйгуннук үөрэнэн бүтэрэр. 1993 сыллаахха Новосибирскайдааҕы потребительскай кооперация институтун үөрэнэн бүтэрэр. 2000 сылга Москва куоракка квалификациятын үрдэтэр Москватааҕы потребительскай кооперация институтугар үөрэнэр. 2004 сылтан урбаан эйгэтигэр үлэлии барар. Амма нэһилиэгэр “Дом торговли», ТЦ “Утум”, ТД “Урсун” атыы эргиэн кииннэрэ үлэлии тураллар.
Саха сирин эргиэнин бочуоттаах үлэһитэ, Амма улууһун бочуоттаах мецената, Амма нэһилиэгин бочуоттаах олохтооҕо, «Гражданскай килбиэн” знак хаһаайына, Потребительскай кооперация бочуоттаах үлэһитэ, Амма улууһун оройуоннааҕы советын депутата. 2 оҕолоох, Еремей, Лариса, 4 сиэннээх.
Федотов Спиридон Еремеевич, (08.09.1966-28.12.1993), 1983 сыллаахха Амма орто оскуолатын үөрэнэн бүтэрэр. Ийэ дойдутугар иэһин толорон, Советскай Армия кэккэтигэр сулууспалыыр. 1986 сыллаахха Омскайдааҕы тыа хаһаайыстыбатын институтугар үөрэнэ киирэр. Кэргэннэнэн, оҕолонон, семейнай балаһыанньатынан үөрэҕин ситэри бутэрбэккэ уурайар. Бүлүү улууһуттан төрүттээх Мандарова Татьяна Константиновна диэн кыыһы кэргэн ылар. МВД направлениетынан юридическай үөрэххэ үөрэнэн, лейтенант званиетын ылар. Бүлүү оройуонун ОВД үлэҕэ киирэн үлэлии сылдьан, эдэр сааһыгар, хомолтолоохтук орто дойдуттан барбыта. 3 оҕоломмута: Александр, Ольга, Спиридон. 5 сиэннэрдээх.
