Биһиги таайбыт Илья Егорович Плотников кэргэнэ, саҥаспыт Мария Егоровна 1936 сыллаахха балаҕан ыйын 19 күнүгэр дьадьаҥы ыалга төрөөбүт. Ийэтэ Биэрэ Тараҕай нэһилиэгиттэн сыдьааннаах, кини Сыромятников Егорга (Муодьаҕа) кэргэн тахсан I Мэльдьэхси нэһилиэгэр олорбут. Мария быраатынаан Егордуун оҕо саастара «Тумуһахтаах» өтөҕүнэн, «Улуу булгунньах» сайылыгынан ааспыт. «Мас булгунньахха» үөрэнэн 5 кылааһы бүтэрбит, онтон «Үүнүү» холкуоска үлэлээбит.

 1963-1965 сылларга олоҕун аргыһын Илья Егорович Плотниковтыын ыал буолбута. Ийэтэ Биэрэ кинилэргэ олороро, сүрдээх сымнаҕас, үлэһит, минньигэс баҕайы астаах этэ. Саҥаспыт Маайыс холкуоска, сопхуоска дайааркалыыра, ньирэй көрөрө. Хотуулаахтык үлэлээн оройуоҥҥа хас да социалистическай күрэх кыайыылааҕа буолбута, «Чемпион ыанньыксыт» аатын ылбыта. Москва, Ленинград куораттарынан күүлэйдиир босхо путевканан наҕараадаланан «ВДН»-ҕа сылдьар чиэскэ тиксибитэ. 1 ыйдаах оҕону бүөбэйдээн иитэннэр, кыыстара Маргарита улаатан, медсестра үөрэҕин бүтэрэн, ыал буолан, билигин 5 оҕолоох дьиэ кэргэн ийэтэ. Саҥаспыт таайбытынаан 50 сыл этэҥҥэ бииргэ олорон Мэльдьэхси нэһилиэгин «Ытык ыал» анал аат хаһаайыттара буолбуттара.

Мария Егоровна үтүө суобастаах үлэтэ тыа хаһаайыстыбатын управлениетын, холкуос, сопхуос салалтатын  Почетнай грамоталарынан, Махтал суруктарынан, премияларынан бэлиэтэммиттэрэ.

Оонньообот оҕо саастаах «Үлэ ветерана» саҥаспыт Мария Егоровна «Үүнүү» холкуоска, «Г.Попов аатынан» сопхуоска таһаарыылаахтык үлэлээн эйэлээх олоҕу уһансыбыта.

Шарин Эдуард Петрович, аймаҕа,

Мэҥэ-Хаҥалас улууһа, Майа с.