Слепцов Вячеслав Гаврилович  (1939-2017)  1939 сыллаахха  сэтинньи   29 күнүгэр Анаабыр улууһун Саскылаах нэһилиэгэр биэлсэр идэлээх Слепцов Гаврил Данилович уонна Тарабукина Аграфена Прокопьевна эдэр ыалга бастакы оҕонон күн сирин көрбүтэ. Аҕата Таатта Уолбатыттан, ийэтэ Уус-Тааттаттан төрүттээхтэр. Эдэр дьон Дьокуускайдааҕы фельдшерскай-акушерскай училищены бүтэрэн, хоту оройуоҥҥа анаммыттара. Сэрии кэмигэр Анаабырга үлэлээбиттэрэ. Дьиэ кэргэнинэн 1947 с. Анаабыртан Тааттаҕа, 1950 с. Ударникка көһөн кэлбиттэрэ. Аҕата Гаврил Данилович  «ССРС доруобуйа харыстабылын туйгуна» бэлиэнэн, «Аҕа дойду Улуу сэриитигэр килбиэннээх үлэтин иһин», «В.И.Ленин төрөөбүтэ 100 сыла» мэтээллэринэн, Саха АССР Верховнай Сэбиэтин Президиумун Бочуотунай грамоталарынан (1947 с, 1957 с.) наҕараадаламмыта. Ийэтэ Аграфена Прокофьевна, элбэх оҕолоох ыал хаһаайката, 1-2-3 степеннээх “Материнская слава” бэлиэлээх.   Вячеслав Гаврилович оскуоланы Таатта оройуонун Ытык-Күөлүгэр бүтэрбитэ. 1961 с. “Томпо” совхозка кочегарынан үлэлии киирбитэ. 1962-1966 сс. армияҕа Тихоокеанскай флокка Владивосток куоракка сулууспалаабыта. 1967-1968 сс. биир сыллааҕы курска үөрэнэн суоппар идэтин баһылаабыта. Араас сылларга Аллараа Бэстээхтээҕи нефтебазаҕа завхоһунан,  Дьокуускайдааҕы  Геологоуправление киин лабораториятыгар  рабочайынан, «Сельхозтехника” ПМКҕа слесарынан, Герой Ф.М.Охлопков аатынан совхозка слесарынан, рабочайынан, сантехнигынан, кочегарынан үлэлээбитэ.  IV разрядтаах слесарь, II разрядтаах слесарь-сантехник.  «Кыайыы 20 сылынан» юбилейнай мэтээлинэн (1965), социалистическай күрэхтэһии кыайыылааҕа знагынан (1973) наҕараадаламмыта. Уус-уран самодеятельность актыыбынай кыттыылааҕа. Студенныы сылдьан  Москва куоракка фестивальга кыттыыны ылбыта. Биэнсийэҕэ 1989 с.тахсыбыта.  2015 с. сэрии кэмин оҕолорун испииһэгэр киллэриллибитэ. 2017 с. өлбүтэ.

                                                                                                                                                       Елена Винокурова, Хаандыга бөһүөлэгэ