Кириллин Терентий Егорович. Рядовой. (1916-1967 сс.) 1916 с. бэс ыйын 14 күнүгэр Нөөрүктээйи нэһилиэгэр төрөөбүтэ. 4 кылаастaax церковнай приходской оскуоланы үөрэнэн бүтэрбитэ. 1941 с. от ыйыгар сэриигэ ыҥырыллыбыта. Украинскай фронт састаабыгар киирэр 93 стрелковай дивизияҕа ытааччынан сэриилэспитэ. 1942 с. Киев туһаайыытынан сэриилэһэ сылдьан атаҕар бааһыран дойдутугар төннөн үлэлээн иһэн иккиһин ыҥырыллан 1944 с. ыалдьан төрөөбүт дойдутугар иккистээн эргиллэр.

Наҕараадалара: «Германияны кыайыы иһин», Аҕа дойду Улуу сэриитин II степеннээх уордьана, юбилейнай мэтээллэр.

Кириллин Терентий Егорович биографията. Аҕам Кириллин Терентий Егорович 1916 с. бэс ыйын 14 к. Илин Хаҥалас улууһугар Нөөрүктээйи нэһилиэгэр төрөөн-үөскээн улааппыта. Ийэтэ кыратыгар өлбүтэ. Аҕата кырдьаҕас 1869 с. төрүөх. Оҕонньор уолун Преображенский таҥаратын дьиэтигэр сүрэхтэтэн Терентий диэн ааты бэрдэрбит. Аҕабыт Ой-Бэстээҕи церковнай приходскай оскуолаҕа үөрэнэн 4 кылааһы бүтэрбит. Онтон кэлин осеменатордар куурустарыгар үөрэнэн техник-осеменатор идэтин ылбыта. Сэрии иннинэ «Ленин», «Саҥа олох» колхуостарга хара үлэҕэ үлэлээбитэ. 1941 с. сэриигэ ыҥырыллан сэриилэһэн баас ылын дойдутугар кэлэн баран, арыый буолаат иккиһин ыҥырыллан Илин Монголия сиригэр сулууспалыы сылдьан, ыалдьан инбэлиит буолан дойдутугар иккистээн эргиллибитэ. Сэриигэ сылдьыбытын хам-түм кэпсээтэҕинэ: «Сэрии маҥнайгы сылларыгар аармыйа халыҥ этэ эрээри, техника, сэрии сэбин араас көрүҥэ олох мөлтөх этэ. Араас омук уолаттарынаан биир кэккэҕэ сэриилэспиппит. Ордук нууччалар эриигэ харса суох атаакаҕа киирэллэрэ. Киһи бөҕө өлөр этэ да аҥаттан саҥа сэрии дьоно быыстала суох кэлэ тураллара. Төһөлөөх иһи өлбүтүн, сүппүтүн ким билиэ баарай» диирэ. Сэрииттэн кэлэн баран 1945 с. сэрии огдооботугар мин ийэбэр Стручкова Варвара Михайловнаҕа кэргэннэммитэ. Ийэм маҥнайгы кэргэниттэн оҕото Дмитриев Дмитрий Алексеевич сэриигэ баран өлбүтэ. Уола Дмитриев Николай кэлин өлбүтэ, икки оҕолоох. Ийэм аҕабынаан 4 оҕоломмуттара.