Икки Геройдаах нэһилиэк Саха сиригэр суоҕа буолуо.  Аан дойду историятыгар саамай элбэх хаан тохтуулаах, үгүс киһи өлүүлээх, үгүс хоромньулаах Аҕа дойду Улуу сэриитигэр Бүлүү улууһуттан 2180 киһи ыҥырыллыбыта, кинилэр истэригэр Тоҕус (Балаҕаччы) нэһилиэгиттэн  109 киһи ыҥырыллан ытык иэстэрин төлүү барбыттара. Кинилэртэн 63 киһи сэрии толоонуттан төннүбэтэҕэ. Үлэ фронугар 46 биир дойдулаахтарбыт күүстэрин харыстаабакка үлэлээбиттэрэ.  Сэрии ыар тыына хас биирдии дьиэ кэргэни таарыйбыта. Ол курдук, Петр Николаевич уонна Евдо-кия Яковлевна  Борисовтар 5 уолаттарын сэрии мэҥэстибитэ. Ийэ дойду көмүскэлигэр олохторун, эдэркээн саастарын  толук уурбут хорсун буойуттар ааттарын үйэтитии үлэтэ барар.

Бүлүү улууһа үс  Советскай Союз Геройдаах. Кинилэр улуус олохтоохторун киэн туттуулара буолаллар. Геройдар албан ааттарын  улуус үс бөдөҥ оскуолата сүгэр.  Олортон биирдэстэрэ  Мастаах орто оскуолата 1990 сыллаахтан  Советскай Союз Геройун  Алексей Афанасьевич  Миронов аатын сүгэр.

А.А. Миронов 1912 с. Үөһээ Бүлүү улууһугар Кэнтик нэһилиэгэр Батастаах диэн өтөххө төрөөбүтэ. 1924 сылаахха  Алексей 12 саастаа5ар Бала5аччыга букатыннаахтык олохсуйбуттара. 1924 сыллаа5ы үөрэх дьылыгар Алексей Балаҕаччы (Мастаах) 4 кылаастаах оскуолатыгар үөрэнэ киирэр. 3 кылааска үөрэнэ сылдьан комсомол кэккэтигэр киирбитэ. 1929 сыл кыһын Мастаах улууһунааҕы комсомол ячейкатын иккис секретарынан талыллар. Сэриигэ УСУ инспекторынан үлэлии сылдьан барбыта. Сэрии иннигэр ыал буолан, үс оҕону төрөппүт: Вася, Луиза уонна Зина. Кини амарах аҕа, кэргэн, убай буоларын туһунан фронтан ыыппыт дириҥ иэйиилээх суруктара кэпсииллэр.