Они сражались за Родину

 
 
Годы жизни: 1915-1993

 

 

 

Кыайыыны уһансыбыта

 

Аҕа дойду сэриитин бойобуой кыттыылааҕа, ветеран-буойун  Габышев Георгий Романович Мэҥэ улууһун  11- Мэлдьэхси нэһилиэгэр 1915

сыллаахха төрөөбүтэ.  Оччолорго үгүс саха дьонун үөрэхтээх оҥорбут

Бутэйдээх церковно- приходской оскуолатыгар үөрэнэн баран дойдутугар

кэлэн суруксуттаабыта. Оччолорго «суруксут» диэн биир убаастанар

үлэ, дуоһунас этэ.

 Георгий Романович 1941 с. сыл атырдьах ыйыгар Ийэ дойдутун

көмүскүү саллаат сиэрэй синиэлин кэтэн уоттаах сэриигэ аттаммыта. Өр

баҕайы айаннаан Москва аттыгар кэлбиттэрэ. Немецтэр биһиги дойдубут

тэбэр сүрэҕэр чугаһаан кэлбиттэрэ кутталы үөскэппитэ.

Кини Волховскай фроҥҥа  1013-с стрелковай полкага сэриилэһэ сылдьан

1942 с . олунньу 3 күнүгэр ыараханнык уҥа илиитигэр бааһырбыта. Илиитэ

тугу да туттарбат буолбута. Өр сытан  эмтэммитэ эрээри, аны ис тиибигэр ылларан хайдар аҥара эрэ хаалбыта,  сэриилэһэр кыаҕа суох диэн военнай комиссия Горькайдааҕы (Нижний Новгород) байыаннай танканы оҥорор заводка военнай тыылга хаалларбыттара.  Балаһыанньа байыаннай этэ, түүн өстөөхтөр кэлэн бомбалыыллара, ол да буоллар  собуот  хас  да сменанан тохтобула суох үлэлиирэ. Бу заводка элбэх омук дьонноро  өстөөҕү самнарар, кыайар санаанан өрө күүрүүлээхтик үлэлииллэрэ. Килиэп, атын ас барыта талоҥҥа эрэ бэриллэрэ. Бары Кыайыы күнэ буолуо диэн эрэнэллэрэ.

Дойдутугар 1946 сыллаахха сир-дойду күөҕүнэн симэнэн турдаҕына бэс

ыйыгар кыайыыны кынаттанан төннөн кэлбитэ.

Сэрии туһунан кэпсиирин отой сөбүлээбэт этэ. Ону кыыһа маннык диэн ахтар:

 

Мин аҕам хаһан да бэйэтэ

Сэриини кэпсээбэт буолара,

Ол кыргыс сыллары санаата да

Санаарҕаан сөҥ түһэн ылара…

 

Сэрии кэнниттэн эйэлээх олох саҕаламмыта. Ыал буолар быата тардан 1947 сыллаахха Анисия Гаврильевна (Ноева) Чурапчы Кытаанаҕыттан төрүттээх учуутал кыыһы кытта ыал буолбуттара. 5 оҕоломмуттара. «Хаабыһаптар» -диэн дьоһун-мааны ыал  буолбуттара. Георгий Романович улахан дьиэ кэргэн аҕата, туллубат тутааҕа буолбута. Бастаан утаа Хадаар сельпотун бэрэссэдээтэлинэн, Дириҥҥэ кэлэн үүт-табаарынай ферматын сэбиэдиссэйинэн, кэлин Эрилик Эристиин аатынан колхозка, совхозка ревизионнай комиссия председателинэн 18 сыл бэрт таһаарыылаахтык үлэлээбитэ. Коммунист үрдүк аатын олорорун тухары түһэн биэрбэтэҕэ, колхозка, совхозка партком сэкэрэтээрэ этэ.

1970 с. Улуу Кыайыы 25 сылын туолуутугар бойобуой саллаат Георгий Романович биир дойдулаахтарын кытары  Сталинград (Волгоград) куоракка байыаннай параадка ыҥырыллыбыта.  Ааспыт сэрии оспот баастара эмиэ хаанынан оҕуолаабыттара…

 

Аара дойду тэбэр сүрэҕэр Москва куоракка күүлэйдээн кэлбиттэрэ. Ол

туһунан 2013 сыллаахха балаҕан ыйыгар «Саха» НВК элэс курдук көрдөрөн турар.

Бочуоттаах сынньалаҥҥа тахсан баран совхоз тутуутун ыскылаатыгар

кладовщигынан үлэлээбитэ. Оронун үрдүгэр саамай ытыктыыр дойду

салайааччытын Иосиф Сталин хаартыскатын ыйаан туруорбута. 1993 сыллаахха орто  дойдуттан арахсарыгар онтукатын илдьэ барбыта. Үгүс бойобуой наҕараадалардаах. Сынньалаҥҥа тахсан баран  матассыыкылын собуоттаата да ахтылҕаннаах алааһыгар Быаканатыгар кустуур, куобахтыыр, балыктыыр, от оттуур, сир астаһар этэ. Сиэннэр, хос сиэннэр  Габышев Георгий Романович эппит кэриэс тылларын чиэстээхтик толорорго кыһаллаллар, кини олоҕун үөрэтэллэр, кини курдук патриот, ийэ дойдуну таптыырга, наада буоллаҕына төрөөбүт дойдубут көмүскүүргэ бэлэмнэр, кини олорбут олоҕунан киэн тутталлар, кини курдук сиэрдээх майгылаах дьон буоларга кыһаллаллар.

 Кыыһа Светлана Георгиевна Егорова (Габышева)

 

 

 

 

 

 

 

 

 

 

 

 

    

 

 

 

 

 

 

 

 

 

 

 

 

 

 

 

 

 

    

 

 

 

 

 

Годы службы: 1941 - 1946
Место рождения: Мегинский улус, II Мельджехсинский наслег
Место службы: Волховский фронт 1013-с стрелковый полк
ПОДЕЛИТЬСЯ СТРАНИЦЕЙ