Марков Иннокентий  Егорович  -        Сталинград сэриитин кыттыылааҕа, Марков Егор Данилович – Чороон иккис уола.  И.Е. Марков уолун Егор Иннокентьевич Марков ахтыыта:

         “...Аҕабыт Егор Иннокентьевич Марков дьоҥҥо-сэргэҕэ да, дьиэ кэргэнигэр да сытыары-сымнаҕас майгылаах киһи этэ. Кэтэх тардыстан сынньана сыттаҕына, биһиги мэниктээн дьиэни ылан кэбиһэрбит да, биирдэ улаханнык мөхпүтүн, дьарыйбытын өйдөөбөппүн. Оччоттоҕу хаһыаты, сурунаалы биир тылын ордорбокко ааҕан баран ырытара. Социализм-коммунизм идеяларыгар чахчы бэриниилээҕэ.
60-70с.с Коммунистическкай үлэ ударнига буолбута.
         Сэриигэ аттанарыгар олус бөҕөх санаалаах барбыт үһү, ол оннугар убайа Мэхээлэ олус айманан аттаммыт. Мэхээлэ сэрииттэн эргиллибэтэх.  Бииргэ айаннаан иһэн Красноярскай куораттан тус – туһунан барбыттар, уонна ол кэннэ көрсүбэтэхтэр.

       Аҕабыт сэрии туһунан мээнэ кэпсээбэт буолара, сэриилэһэ оонньуурбутун буойара. Биирдэ эмэ арыгы истэҕинэ кэпсиирэ: Сталинград анныгар кыргыһыыга кыттыбытын, штыковой атаакаҕа, дьулаан хапсыһыыларга элбэх киһи өлүүтэ-сүтүүтэ тахсыбытын... Биир нэдиэлэ устата инники кирбиигэ сытан дьүүлэ-дьаабыта биллибэт ыһыы-хаһыы, тыас-уус, буор будулҕан быыһыгар атаакаҕа киирии кэнниттэн кыра уоскулаҥ биэрбиттэригэр сирэй-харах дьүүлэ-дьаабыта биллибэт, эт-сиин элэйэн, ньиэрбэ-хаан баранан тахсыбыттар...Онтон эмиэ инники кирбиигэ ыыппыттар. Онно, бэһис күнүгэр илиитигэр оскуолка түһэн, бааһыран сыттаҕына өстөөх тааҥката ааһан иһэн баараҕай тиит маһы суулларан ааһан, ол тиит кини үрдүгэр түспүт. Ол кэннэ госпиталга биирдэ өйдөммүт. Сэрии кини туһугар итинэн бүппүт. Сиһин улаханнык эчэттэрэн 3 ый эмтэнэн баран дойдутун суолун быспыт.

       Дойдутугар кэлэн “Коммуна суола”, “Молотов” холкуостарга үлэлии сылдьан Кэбээйигэ кадровай булчутунан барбыт. Бастакы кыһынын соҕотоҕун, онтон кэргэттэринээн кыстаан баран эргиллибит. Онтон кэлин оройуон уһуктарынан бэдэрээккэ түбэһэн оскуола тутууларыгар икки-үс сыл устата үлэлээбит. Бөдөҥсүйбүт “Октябрь” холкуоска тимир, мас ууһунан, от үлэтигэр кыдамаһытынан, көлө косилкаһытынан үлэлээбитэ. Олбуор кэтэҕэр сыарҕа сыҥааҕын иэҕэр  этэ, онтун маһынан таттаран курулуура. Ити курдук кыһыннары-сайыннары таҥара.

      Уус дьиэтигэр үлэлиир кэмигэр биһиги элбэхтэ сылдьарбыт, сороҕор күөт да күөттэһэрбит. Нэһилиэк киинэ Маттаҕа көспүтүн да кэннэ, аҕабыт Уһун Эбэҕэ кыстыыра, сүөһү аһатара. Сайын Маттаҕа кэлэн уус дьиэтигэр уһанан барара, онно уһана сылдьан тымыр быстан охтубута уонна биир суукка өйө суох сытан баран, тыына быстыбыта. Сэрии эмсэҕэлээһинэ, сут кыһарҕана эрдэ үйэлээтэҕэ буолуо...”

                                                                                     1995 сыл