Белолюбский Михаил Евсеевич
5 оҕолоох, Таатта улууһун Баайаҕа нэһилиэгэр Байымаайы сиригэр төрөөбүтэ
Наҕараадалара:
Мин хос эһэм – Улуу сэрии кыттыылааҕа
Мин хос эһэм Белолюбскай Михаил Евсеевич 1919 сыллаахха төрөөбүтэ. Ийэтин аата Агафья Николаевна, аҕатын аата Евсей Никифорович Белолюбскайдар.
Бииргэ төрөөбүттэр сэттиэлэр. Бииргэ төрөөбүт быраата Семен Евсеевич сэриигэ кыттыбыта.
Хос эһэм оскуолаҕа үөрэммэтэҕэ. Кини «Кутаама» холкуоска үлэлээбит.
1942 сыллаахха Чурапчы военкоматынан сэриигэ ынырыллан барбыт.
1943 сыллаахха Ильмень күөлгэ сэриигэ кыттыбыт, сэрии кэмигэр билиэҥҥэ түбэһэн сылдьыбыт.
1946 сыллаахха билиэнтэн босхолонон дойдутугар эргиллэн кэлбит.
1948 сыллаахха Неустроева Ульяна Федотовналыын, мин хос эбэбинээн, ыал буолан 5 оҕоломмуттар.
Хос эһэм Михаил Евсеевич эйэлээх олоххо холкуоска, сопхуоска үтүө суобастаахтык үлэлээбит.
Хос эһэбин эһэм Сэмэн төрөппүт аҕата буолар. Кини аҕата билиэҥҥэ сылдьыбытын туһунан ийэтэ Ульяна бу курдук кэпсээбит:
«1943 сыллаахха Ильмень күөлгэ уот сэрии буолбут. Үөһэнэн аллараанан уот буурҕа бүтүннүү ытыллан олорор үһү. Муус тостон, дьоннор муус анныгар барбыттар. Михаил арай өйдөнөн кэлбитэ, ньиэмэстэр хаамса сылдьаллар үһү. Билиэн кэмигэр аччыктааһыны, кырбаныыны этэ да барыллыбат. Билиэн түбэспит дьон ортотугар нуучча уолаттара баар буоланнар, тыыннаах эргийэн кэлбитим диирэ».
Сэбиэскэй сэриилэр кимэн киириилэригэр ньиэмэстэр ыксаан билиэннэйдэри өлөрбөккө, билиэннэйдэр куотан тыыннаах хаалбыттар. Онтон билиэн кэнниттэн кэтэбилгэ-манабылга сылдьан өссө биир эрэйи көрбүт.
«Кыым» хаһыакка Ильмень күөлгэ сэриилэһэ сылдьыбыт дьон туһунан ыстатыйа тахсыбыт этэ. Онно Михаил Евсеевич Белолюбскай геройдуу өлбүт, билиитэтэ Старай Руссаҕа баар диэбиттэр үһү. «Ону биһиги аҕабытыгар тыыннааххын биллэриэххэ диэбиппитин сөбүлээбэтэҕэ, эрэйи көрбүтүн уонна ааспыты сөргүтүөн баҕарбат этэ», - диэн эһэм Сэмэн кэпсиирэ.
Мин хос эһэбинэн киэн туттабын!
Белолюбскай Ярослав, Баайаҕа орто оскуолатын
1 кылааһын үөрэнээччитэ
