Филиппов Михаил Прокопьевич. (1919-1944)
Ийэм, Филиппова Мария Прокопьевна тапталлаах бииргэ иитиллибит убайа, Филиппов Михаил Прокопьевич, 1919 сыллаахха Ньурба оройуонун Хаҥалас нэһилиэгэр төрөөбүт. Аҕата Филиппов Прокопий Васильевич, ийэтэ (аата биллибэт) суос соҕотох Михаил диэн төрөппүт уоллаахтар эбит. Ийэм төрөппүттэрэ эрдэ өлөннөр, түөрт оҕо тулаайах хаалан, ыалларынан иитийэххэ барбыттар. Ол саҕана, тулаайах оҕолору ыаллар ииттэ ылаллар эбит. Ол курдук, мин ийэбин Филипповтар (Хаптаҕай оҕонньордоох) диэн биир уол оҕолоох ыал, иккис оҕоннон ииттэ ылбыттар. Бэйэлэрин анныларынан суруттарбыттар, онон, Алексеева Мария Даниловна диэн оҕо, иитийэххэ баран, толору аата-Филиппова Мария Прокопьевна диэн буолбут. Убайынаан олус иллээхтэр эбит. Аҕа дойду сэриитэ саҕаламмытыгар, кыанар дьону барыларын, саа-саадах туттаран, сэриигэ илдьибиттэр. Сылын аайы хомуур оҥорон, сэриигэ ыыталыыллар эбит. Хаҥалас нэһилиэгиттэн 06.06.1942 сыллаахха, саамай уоттаах сэрии сытыырҕайан турар кэмигэр, саамай "кырыктаах" хомуурга түбэһэн, биһиги таайбыт Филиппов Михаил Прокопьевич, Алексеев Гаврил Иванович, Антонов Илья Федотович, Кылатчанов Леонтий Павлович уонна онтон да атыттар, бииргэ, "солдат, стрелок" диэн ааттанан, ыытыллыбыттар. Биһиги таайбыт кыра үөрэхтээх буолан, сэриигэ барыан иннинэ "Коммунизм" колхуоска биригэдьиирдээн, кыладабсыыктаан сылдьыбыт. 1939 сылаахха "Додой Тэрэппиин" улахан кыыһын, Григорьева Александра Трофимовнаны кэргэн ылан, ыал буолбуттар. Сэриигэ барарыгар 23 саастаах эбит, Ньурба ОБК ыҥыран, "Коммунизм" колхуостан "стрелок" быһыытынан ылбыттар. Кыра үөрэхтээх буолан, сурук диэни суруйбатах. 1944 сыллаахха сураҕа суох сүппүт. Мин ийэм Филиппова Мария Прокопьевна бииргэ төрөөбүт убайа Алексеев Гаврил Данилович Дьоппуон сэриититтэн тыыннаах эргиллэн, 60-с сыллардаахха биирдэ ийэбин булбут. Ол, тулаайах оҕолор, тус-туһунан ыалга иитиллибиттэрин содула этэ. Хас сылын ахсын, Кыайыы бырааһынньыга чугаһаатар эрэ, ийэм бииргэ иитиллибит убайын Мэхээлэни ахтара-саныыра элбиирэ: "Кэргэнин өттүттэн ирдэһэр киһи суох"-диирэ, наар: "Баҕар, көмүллүбүт сирэ биллэн, көстөн кэлиэ" диэн саныыра, төһө да 70 сыл аастар, ээр-сэмээр, олохтон барыар диэри кэтэһээхтээбитэ. Таайбыт Михаил Прокопьевич кэргэнэ Александра Трофимовна "Кэргэнэ сэриигэ сураҕа суох сүппүтүн туһунан" биллэрик сурук туппут. Онтон, кэлин иккистээн эргэ тахсан, уол оҕону ииттибиттэр, билигин Андреев Руслан Семенович ыал буолан, Ньурба оройуонун Сүлэ нэһилиэгэр олорор. Александра Трофимовна төһө да иккистээн ыал буоллар, бастакы кэргэнин кэриэстээн, Филиппова диэн апаспаанньатын уларыппатах.
Ахтыыны суруйда Сартаева-Васильева Валентина Васильевна, үлэ бэтэрээнэ, Ньурба куорат, Хаҥалас нэһилиэгин бочуоттаах олохтооҕо, Саха Өрөспүүбүлүкэтин "Гражданскай көҕүлээһин" туйгуна, үтүөлээх сынньалаҥҥа олорор. Дьокуускай куорат.
