Сталинград фронугар сэриилэспит саха буойуна МЯКЧЕГИРОВ ФЕДОР САВВИЧ Үгулээт нэһилиэгэр төрөөбүтэ, онтон 4 кылааһы бүтэрэн Бүлүү детдомугар 1936 с. дылы иитиллэн баран, ийэтэ ыал буолбутугар Тылгыныга тахсан, "Ыччат сайдыыта" холкуоска үлэлээбитэ. 1942 сыллаахха аармыйаҕа ыҥырыллан, икки ый Челябинскай уобалаһыгар үөрэнэн баран, Сталинградскай фроҥҥа тиийбитэ. Биир түүн суһал сорудах ылбыт: түөрт оҕо разведкаҕа барбыттарыттан иккитэ өлбут, иккитэ - бааһырбыт. Ити икки оҕону өрүһүйэргэ киниэхэ бирикээс биэрбиттэр. Ол гынан баран биирин эрэ таһаарбыт, биирдэрэ сонно өлбүт. Сэрии кэмигэр күн ахсын 120 ботуруону ылан быыстала суох ытыалыыллар эбит. Ити бириэмэҕэ өстөөх икки төгүл улахан атаакалары оҥортообут. Маҥнайгы киириилэригэр фронт 20 эрэ миэтирэ хаалыар диэри субу кэлбитин сэбиэскэй саллааттар станковой пулеметтарынан кириэстии уоту аһан чугуппуттар. Дьэ ити кэнниттэн кыайыы саҕаламмыт. Биэс хонон баран подкрепление кэлбитигэр халлаан сырдыан аҕай иннинэ атаака оҥорбуттар. Сүтүк элбэх эбит. Федор Саввич ротата 160 киһилээҕиттэн 8 эрэ буолан тыыннаах хаалбыттар. Дьэ ити кэнниттэн биэс күн устата, бааһырыар диэри, тохтоло суох атаакаҕа сэриилэспит. Сталинград олох чугаһаабытын кэннэ миинэ хаҥас өттүгэр түһэн, хаҥас илиитин тоҥолоҕун аллараа өттүн дьөлө көппүт. Үлтүрүйбүт илиитин төбөтүгэр уурунан, тобугун эмиэ миинэҕэ бааһырдан, кэлбит сирин диэки баран иһэрин санитардан көрсөн, наһыылканан полевой госпитальга  илдьибиттэр. Нөҥүө күнүгэр саллаат бааһырбыт илиитин быспыттар. Икки ый курдук эмтэнэн баран дойдутугар эргиллэн кэлбит. Сэрииттэн кэлэн баран нарсудка исполнителынан, райпоҕа бухгалтерынан, Тылгыныга кэлэн сэбиэт сэкэрэтээринэн уо.д.а. үлэлэргэ үлэлээбитэ. Олоҕун доҕорун Васильева Ирина Руфовнаны кытта биэс оҕону улаатыннарбыттара. Кинилэр сиэннэрэ, хос сиэннэрэ билигин араас сирдэргэ үлэ үөһүгэр сылдьаллар. Бойобуой саллаат Мякчегиров Ф.С. Албат аат уордьан үһүс степенинэн, Аҕа Дойду сэриитин 1 степеннээх  уордьанынан, СССР Сэбилэниилээх Күүстэрин 50, 60, 70 сылларыгар аналлаах мэдээллэринэн наҕараадаламмыта. Сэрии бэтэрээнэ, буойун Мякчегиров Ф.С. аатын дьон-сэргэ умнубат.