Сэрии бэтэрээнэ, буойун КОНОНОВ ИВАН ГЕРАСИМОВИЧ 1918 сыллаахха төрөөбүт. Сэриигэ 1941 сыл балаҕан ыйын 1 кунугэр дойдуларыттан 10 буолан барбыттар. Мальтаҕа биир ый байыаннай үөрэххэ үөрэнэн баран ахсынньы ыйга Курскай уобаласка тиийбит. Манна өстөөх самолетун буомбатын, быыстала суох ытыалаһыы ортотугар аатын билбэт өрүһүн биэрэгэр (Днепр салаата буолуо - саллаат ахтыытыгар маннык суруйбут) бөҕөргөтүнэ сытар өстөөҕү атаакалааһыҥҥа кыттыбыт. Иван Герасимович кэлин ахтыытыгар "...Өлүү-сүтүү, хаан-сиин, ыһыы-хаһыы - икки атахтаах тулуйбат үлүгэрэ,"- диэн суруйбута. Биир атаакаҕа кини илиитигэр бааһыран, сэрии хонуутуттан туораан, "чэпчэкилэр" 40 км сатыы хааман Белгородка тиийбиттэрэ. Ереван куоракка икки ый эмтэммитэ. Дойдутугар эргиллэн кэлэн, атыыһытынан ананан үлэлээбитэ. Ыччаттар комсомольскай тэрилтэ сэкэрэтээринэн талбыттара. Иван Герасимович салалтатынан ыччаттар фроҥҥа ичигэс таҥас тигиитигэр, өҥнөөх металл хомуйуутугар, холкуос үлэтигэр барытыгар көхтөөхтүк үлэлээбиттэрэ. Үлэ үөһүгэр сылдьан, 1943 сыллаахха олоҕун доҕорун Гаврильева Дария Григорьевнаны кытта ыал буолбуттара.  Кинилэр алта оҕону төрөтөн, иитэн дьоһун дьон гына улаатыннарбыттара. Иван Герасимович бэйэтин ахтыытыгар "... орто дойдуттан арахсыбыппыт да иһин баараҕай тиит мас буолан үйэлэри уҥуордуохпут - ол биһиги сирдээҕи дьолбут" диэн олохторун салгыыр бары ыччаттарыгар анаан суруйан хаалларбыт. Кононов И.Г. Аҕа Дойду сэриитин 1,2 степеннээх уордьаннарынан, үбүлүөйдээх мэдээллэринэн наҕараадаламмыта. Буойун Кононов И.Г. аата дойдутугар умнуллубат.