Биир дойдулаахпыт, сэрии кыттыылааҕа, буойун НИКОЛАЕВ ЕВСЕЙ ЗАХАРОВИЧ 1908 сыллаахха төрөөбүт. Обуой Ньукулайын уола. Холкуос тэриллиэн иннигэр сүөһү ииттэн, бултаан аһаан олорбуттар. Боотулу оскуолатыгар икки кылааһы бүтэрбит. 1943 сыл бэс ыйын 17 күнүгэр холкуоска суотчутунан үлэлии сылдьан сэриигэ ыҥырыллыбыта. Иркутскайга 704 нүөмэрдээх байыаннай чааска сылдьыбыт. Доруобуйатынан сыыйыллан 1943 сыл ахсынньы 30 күнүгэр кэлбит. 1944 сыллаахха сэрии инбэлиитэ буолбут. Сэрии кэнниттэн куоратынан, Мастааҕынан сылдьан араас үлэҕэ үлэлээбит. Кырдьар сааһыгар Тылгыныга почтальоннаабыта. Бастакы кэргэнэ - Сергеев кыыһа Өрүүнэ. Элбэх оҕолоохтор. Кыргыттара үгүстэрэ ыал ийэлэрэ буолбуттар. Улахан кыыстара Марфа (1925-1960) кэргэннэммэтэх, быраатын Декабры харайбыт эбит. Иккис уол оҕо Коля 1927 с. Бүлүүгэ ууга туһэн өлбүт. Үһүс оҕолоро Мария Евсеевна Дьокуускайдааҕы медучилищены бүтэрэн баран Дьөккөҥҥө, кэлин Хампаҕа фельдшердээбитэ. Мария Евсеевна  оҕолоруттан врач кыыс Тылгыныга, ийэтин дойдутугар, үлэлии сылдьыбыта (Шамаева М.А.). Варвара Евсеевна биэс оҕолоох, Бүлүүгэ олорбута. Евсей Захарович бэһис оҕото Евдокия Евсеевна (1932-1986) кэргэнэ нэһилиэк бастакы тракториһа Семенов Василий Тарасович. Кинилэр алта оҕолоохтор. Алтыс оҕо Анна Евсеевна (1934-1986) кэргэнэ Степанов Егор Петрович (иккис) - Оччугуй Дьөгүөр. Анна Евсеевна, Егор Петрович дойдуларыгар совхозка араас үлэҕэ үтүө суобастаахтык үлэлээбиттэрэ.  Ыалдьан олохтон эрдэ туорааннар, аҕыс оҕо бэйэ бэйэлэрин харайсан, бары үлэһит дьон буолбуттара. Сэттис оҕолоро Декабрь 21 саастааҕар ыалдьан өлбүт. Евсей Захарович кэлин сааһыран баран, Балаҕаччыттан төрүттээх Өрүүнэ диэни кэргэн ылан, сүүрбэччэ сыл бэрт иллээхтик олорбуттар. Максимова Анна Захаровна кыра кыыһын (Кондакова Екатерина Ивановна, Максимов Василий Васильевич ийэлэрэ) Валентинаны ииттэ ылбыттара. Валентина Евсеевна Хампаҕа олорор. Детсад сэбиэдиссэйинэн үтүө суобастаахтык өр сылларга үлэлиир. Кэргэнэ Василий Тимофеевич Турантаев государственнай, муниципальнай сулууспаҕа үлэлээбитэ, билигин бочуоттаах сынньалаҥҥа олорор. Оҕолоро үөрэхтээх, үлэһит дьон. Тылгыны төрүт олохтооҕо, буойун Николаев Е.З. аата дойдутугар умнуллубат.