Васильева Анна Дмитриевна – Төгүрүк Аана 1904 с. элбэх оҕолоох дьадаҥы Даарыйа уонна Миитэрэй Слепцовтар дьиэ кэргэннэригэр иккис оҕонон төрөөбүтэ. Аҕалара Бырдыр Миитэрэй ыарыһах буолан уонна оччотооҕу кэмҥэ иитэр да кыахтара суох буолан сорох оҕолору уруулара ииппиттэрэ. Аана ииппит таайа Куччугуй Баһылай аатынан араспаанньата Васильева буолбут. Иитийэх дьоно эрдэ өлөннөр тулаайах хаалбыта.

Маҥнайгы колхозтаах, пенсияҕа тахсыар дылы үйэлээх сааһыгар бастыҥ ыанньыксыт. Сэрии иннинээҕи уонна сэрии кэмнэригэр хонуу, сүөһү көрүүтүгэр үлэлээн бастыҥнар кэккэлэригэр сылдьыбыта.  Советскай Армияҕа ыҥырыллыбыт колхозтаахтары солбуйан, эр киһи үлэтин толоруохтаах ыарахан үлэтин барытын толороро. Сайынын от охсоро, бурдук быһара, молотилкаҕа бурдук сыстарара. Кыһынын сүөһү көрүүтүн үлэтигэр, ордук ыанньыксыттаан колхоз биллиилээх үлэһитинэн буолбута. Төрүөҕү ылыыга, сүөһүттэн бородууксуйаны ылыыга былаанын аһара толороро. Сэрии кэннинээҕи сылларга бөдөҥсүйбүт «Коллективист», «Коммунизм суола», «Марха» совхоз фермаларын бастыҥ ыанньыксыта. Кыайыы туһугар үлэҕэ бэриниилээх буолуу холобурун көрдөрбүт нэһилиэк биир бастыҥ киһитэ буолар. Түөрт Правительственнай наҕараадалаах, ол иһигэр «Аҕа дойдуну көмүскүүр Улуу сэрии 1941-1945 сс. килбиэннээх үлэтин иһин» мэтээл.