Биһиги аҕабыт,Ноговицын Егор Алексеевич,1919 сыллаахха Хоро нэһилиэгэр Мэҥиэлээххэ төрөөбүтэ. Чараҥ начальнай оскуолатын бүтэрбитэ.1937-1940 сс. ликбезкэ учууталлаабыта,колхоз комсомольскай тэрилтэтин секретаря этэ.1940 с.Дьокуускайга колхоз председателлэрин оскуолатыгар үөрэнэн тахсарын кытта,иккис Лөгөйгө Калинин аатынан колхозка председателинэн быыбардаабыттара.1942 с. бэс ыйын 22 күнүгэр бэбиэскэ туппута. Байыаннай үөрэххэ Молотонскай уобаласка сылдьыбыта. Онтон Москва оборонатын оҥорууга үлэлээбитэ. Фроҥҥа Гжадскай туһаайыытынан 5-с армия 29-с гвардейскай стрелковай дивизиятыгар охсуспута. Гвардеец Егор Алексеевич бу дивизия 90-с гвардейскай стрелковай полкатыгар бастаан миномётчигынан,онтон автоматчигынан сэриилэспитэ. Сэрии толоонугар сылдьан үс төгүл бааһырбыта, Ржев куорат чугаһыгар ыараннык бааһыран 1943 с.от ыйыгар 2-с группалаах инбэлиит буолан дойдутугар эргиллибитэ.Кини кэлээт,Уус-Алданнааҕы райсоюзка старшай инспекторынан,заготовка председателинэн,барыта 20-чэ сыл эргиэн тэрилтэлэригэр үлэлээбитэ. Кэлин,пенсияҕа тахсан баран,Бороҕоннооҕу бытовой комбинатка,суол учаастагар завхоһунан үлэлээбитэ.Егор Алексеевич "Хорсунун иһин", "Германияны кыайыы иһин" мэтээллэрдээх. Аҕа дойдуну көмүскүүр Сэрии бастакы степеннээх орденнаах. 1991 сыл Бороҕоҥҥо ыалдьан өлбүтэ.

Ахтыыны суруйдулар кыргыттара: Ноговицына Галина Егоровна, Ноговицына Нюргуяна Егоровна.