Леверьев Егор Трофимович,  1906 сыллаахха Хаҥалас улууһун Сиинэтигэр Хатыҥ Арыы диэн сиргэ төрөөбүтэ. Аҕалара ыалдьан өлөрүгэр, Егор 13 саастааҕа, убайа 14 эрэ саастаах эбит, инньэ гынан ийэлээх балтыларынаан тулаайах хаалбыттар. Бу 13-14 саастаах уолаттар, кумалааҥҥа барымаары, бэйэлэрин күүстэринэн күн сардаҥатын кытары туран, үлэлээн-хамсаан, оттонуох сир баарыгар барытыгар оттоон, кыстыыр отторун, мастарын бэлэмнэнэн, этэҥҥэ кыстаабыттар. Эһиилигэр сүөһүлэрин ахсаанын элбэппиттэр. Кэлин 17-18 саастарыгар эттэрин, арыыларын көмүс хостооччуларга, атыыһыттарга өрүс устун тиэйэн киллэрэн, атастаһан, дьонноругар көмөлөһөр кыахтаммыттар.

Егор Трофимович оскуолаҕа үөрэммэтэх эрээри, ликбезка түбэһэн нууччалыы уонна сахалыы суруйар да, ааҕар да буолбут, ону таһынан айылҕаттан  баай, хомоҕой тыллаах, сытыы уонна мындыр  өйдөөх, илиитигэр уус киһи буолбут.

1943 сыллаахха кини сэриигэ ыҥырыллан барбыт. Керчь куоракка 903-с Горно-Таманскай стрелковай полкаҕа бастаан рядовойунан, онтон пулеметчигынан сулууспалаабыт. Кирпииччэ собуотун көмүскүүргэ 3 истиэпэннээх Албан аат уордьанынан  наҕараадаламмыта. Онтон эчэйэн баран, Тибердаҕа байыаннай-грузинскай суол тутуутугар үлэлээбит. Онно аччыктаан, ыйааһына 40 киилэҕэ түспүт, ол ыарахан кэмнэргэ ас бэрсэн тыынын уһаппыт грузин доҕорун, Юргасов Армен Спиридоновиһы, кэлин наар махтана саныыр этэ. Ол кэннэ ГУАЗ НКВД диэн тэрилтэҕэ билиэҥҥэ түбэспит фашистары харабыллаабыт. Сэрии бүппүтүн кэннэ, дойдутугар 1946 сыллаахха, саас, кулун тутар ыйга кэлбит.

Араас дуоһунастарга үлэлээн, дьон убаастабылын ылан, оҕолорун Нинаны, Октябринаны, Зояны, Марфаны уонна Иваны ыал оҥортоон, элбэх сиэннэнэн, хос сиэннэнэн, 1996 сыллаахха 90 сааһын туолан баран бу сиртэн туораабыт.

Биһиги эһээбитинэн киэн туттабыт, туохтан да толлубат, чаҕыйбат, үлэни өрө тутар, чугас дьонугар аһыныгас уонна амарах сыһыаннаах, байанайдаах булчут уонна балыксыт, дьону эмтиир кыахтаах, тойук туойар, алгыстыыр, маһынан уьанар – бу барыта мин эһээм, Леверьев Егор Трофимович! 

Матвеева Сайыына