Алексеева Александра Иннокентьевна
1929 сыллаахха балаҕан ыйын 24 күнүгэр Тойон Арыыга «Бэчиэкэн» холкуостаахтарын Феодосия уонна Иннокентий Николаевич дьиэ кэргэнигэр төрөөбүт. Ийэтэ хараҕа суох буолан, аҕата Иннокентий Николаевич сэриигэ ыҥырыллан барбытын кэннэ, 15 саастааҕар холкуоска үлэлииргэ күһэллибит. Онон үөрэммэккэ хаалбыт. Бииргэ төрөөбүттэр үс кыыс этилэр уонна биир уол оҕо оһоллонон кыра эрдэҕинэ өлбүт. Аҕатын убайа Алексеев Прокопий Николаевич уонна бырааттара Алексеев Степан Николаевич, Алексеев Дмитрий Николаевич утуу-субуу Аҕа дойдуну көмүскүүр сэриигэ ыҥырыллан барбыттар. Сэрииттэн Алексеев Прокопий Николаевич эргиллэн кэлэн 1972 сылга дылы олорон өлбүт. Уоннааҕылар сэрииттэн эргиллибэтэхтэр. Сэрии кэмигэр, Александра Иннокентьевна кэпсээнинэн, американскай куулунан фроҥҥа ичигэс таҥас тигэн ыыталлара уһү. Онтон 1949 сыл Иванов Афанасий Алексеевич диэн киһиэхэ кэргэн тахсар, кэргэнэ армияҕа сулууспалыы барар, ол кэмҥэ кыыс оҕону төрөтөр. Бэчиэкэҥҥэ олорон илиитин араарбакка ыанньыксыттыы сылдьар, сайын аайы «Ньараас» алааска сайылыыр. 1957 сыллаахха Скрыбыкин Афанасий Иванович диэн Горнай оройуонуттан кэлбит холкуостаах киһиэхэ кэргэн тахсан сэттэ оҕону төрөтөр. Холкуоска ыанньыксыттаабыт сылларыгар үрдүк көрдөрүүлэри ситиһэн передовиктар слеттарыгар кыттыталаабыта, элбэх сыаналаах бэлэхтэри, харчынан бириэмийэлэри ылбыта, ону грамоталара туоһулууллар. Онтон 1969 сылтан “Булгунньахтаах” холкуоска көһөн кэлэн баран «Хара Алдан» хотоҥҥо ыччат-комсомольскай биригээдэтигэр наставнигынан талыллан үлэлээбитэ. «Булгунньахтаах» совхоз ыччат-комсомольскай биригээдэтигэр «Тоҥуоһай» алааһы анаабыта. Онно оройуоҥҥа биллэн таһаарыылаахтык үлэлээбиттэрэ, бочуотунай грамоталарынан, харчынан бириэмийэлэри ылаттаабыттара. Ону хаартыскалар туоһулууллар. Александра Иннокентьевна наҕараадалара: «50 лет Победы в Великой Отечественной войне 1941-1945 гг.» юбилейнай мэтээлинэн 1995 сыллаахха, «За доблестный труд в Великой Отечественной войне 1941-1945 гг.» мэтээлинэн 1992 сыллаахха, «Ветеран тыла» знагынан 1995 сыллаахха, «Ветеран труда» знагынан 1981 сыллаахха уонна Ийэ буолуу Ι, ΙΙ, ΙΙΙ истиэпэннээх мэтээллэринэн наҕараадаламмыта.
Кыыһа Антонова Светлана ахтыыта
