Аҕа дойду сэриитэ 1941 сыллаахха саҕаламмытыгар Тойон Арыыга «Өктөөп суола» холкуоска от-мас үлэтигэр сылдьар төһүү үлэһиттэр сэриигэ ыҥырыллан барбыттара. 1 сыл сайын Куодар алаастан Аммосов Семен Петрович сэриигэ ыҥырыллан барбыта. Ол кэмҥэ кэргэнэ Аммосова Мария Петровна ыанньыксыттыы сылдьара. Кинилэр икки кыыстаахтара: Аммосова Дорусия Семеновна (1937 сыл, сэтинньи ый 17 күнүгэр төрөөбүт), Аммосова Валентина Семеновна (1941 сыл, кулун тутар ый 4 күнүгэр төрөөбүт), биир эрэ сааһын ааспыт оҕо. 1944 сыллаахха аҕалара Аммосов Семен Петрович сураҕа суох сүттэ диэн биллэрии кэлбит. Онтон ийэлэрэ 1949 сыллаахха ыалдьан өлөн хаалбытыгар Дорусия 12 саастаах, Валя 8 саастаах эбиттэр. Ол кэмҥэ ийэлэрэ сэрииттэн эргиллэн кэлбит Герасимов Федор Степановичтыын Улахан Ааҥҥа көһөн олорор кэмнэрэ эбит. Ииппит аҕаларын кытта кэргэн тахсан барыахтарыгар дылы олорбуттара. 1962 сыллаахха Валентина Сата олохтооҕо Фомин Конон Филипповичка кэргэн тахсан Улахан Аантан көһөн кэлбитэ. Валентина Семеновна ыанньыксытынан пенсияҕа тахсыар дылы үлэлээбитэ. Кини төрөппүт оҕолоро: Дуня, Филипп, Елена, Нина уонна Вася. Бииргэ төрөөбүт эдьиийэ Аммосова Дорусия Семеновна билигин Дьокуускай куоракка олорор. Кини түөрт кыыс оҕоломмута: Маша, Варя, Саргылаана, Оксана Гурьевалар.

Молгарова Полина Семеновна ахтыыта