Ольга Афанасьевна аҕата Юрьев Афанасий Григорьевич, ийэтэ Юрьева Евгения Алексеевна икки кыыс оҕолоох эбиттэр. Улахан кыыс Таисия Афанасьевна 6 оҕолоох, Булгунньахтаахха олорбута. Онтон Ольга Афанасьевна 1940 сыллаахха күн сирин көрбүт. Аҕата 1942 сыллаахха Тойон Арыы дьаамыттан сэриигэ барбыт. Аҕата сэриигэ барарыгар балтараа саастаах буолан, бу диэн өйдөөбөт. Ийэтэ кэпсииринэн, Суруктаах Аартыгар дылы атаарбыттар. Ийэтэ «Бөҕө Үрэҕэ» диэн алааска ыанньыксыттаабыт, сарсыарда 4 чааска туран тымтык тутан, ньирэй сосуһан ийэтигэр көмөлөһөр эбит. Оҕолор баран бурдук куолаһын хомуйаллар үһү. “Иэдьэгэйдээх лэппиэскэ  сиирбит наһаа да минньигэс буолара” диир. Аҕатыттан аҕыйах сурук кэлбит, бүтэһик суругар «ручной пулемекка сылдьабын” диэбит. Бары сэрии сылларын оҕолорун курдук эрдэ үлэһит буолбут. 1957 сыллаахха 16 саастааҕар бороон көрөн үлэтин саҕалаабыт, онтон ыанньыксытынан илиитин араарбакка 2001 сыллаахха дылы үлэлээбит. Барыта 44 сыл тухары фермаҕа үлэлээбит. Сылын ахсын үүт ыаһыныгар былаанын толорон 10, 11, 12 пятилеткалар кыайыылаахтара, “Коммунистическай үлэ ударнига”, “Социалистическай куоталаһыы кыайыылааҕа” бэлиэлэринэн, «Үлэҕэ килбиэнин иһин», «В.И.Ленин төрөөбүтэ 100 сылыгар» мэтээллэринэн наҕараадаламмыт. Олохтоох сэбиэт депутатынан талыллан үлэлээбит. 1995 сыл түмүгүнэн «Куодар» ферма старшайа Ольга Афанасьевна былаанын 102 бырыһыан толорон хас биирдии ынахтан 2090-нуу киилэ үүтү ыан үчүгэй көрдөрүүнү ситиспит. 1997 сыллаахха үлэ бары итэҕэстэрин туоратарга ис сүрэҕиттэн кыһаллар, элбэх куоталаһыы кыайыылааҕа  ыанньыксыт «Тыа хаһаайыстыбатын үтүөлээх үлэһитэ» үрдүк аакка тиксибит. Таһаарыылаах үлэтин почетнай грамоталар, дипломнар туоһулууллар. Үлэ ветерана 8 оҕо, 17 сиэн, 5 хос сиэн амарах ийэтэ-эбэтэ, оҕолорун-сиэннэрин «үлэни таптааҥ, үтүө майгылаах буолуҥ» диэн өрүү үөрэтэ-такайа, сүбэлии-амалыы сылдьар.