- Мин Тойон Арыы дьаамыгар 1938 сыллаахха төрөөбүтүм. Ийэбит Соколова Анастасия Митрофановна. Аҕабыт Соколов Роман Егорович сэрииттэн эргиллибэтэҕэ. Биһиги ийэбитинээн хаалбыппыт. Ийэбит холкуоска ыанньыксыттаабыта. Сэрии саҕана уонна сэрии кэнниттэн олох кытаанах этэ. Ас-таҥас кэмчитэ. Кыһынын дэриэбинэҕэ кыстыырбыт, сайынын буоллаҕына алааска көһөрбүт. Биһиги оҕолор ийэлэрбитигэр көмөлөһөн ынах этэрэн уонна ньирэйдэри бостууктуур этибит. Ол саҕана ньирэй көрөөччү суох буолан ыанньыксыттар бэйэлэрэ ньирэйдэрин көрөр этилэр. Ынахтар мэччийэ бардахтарына ньирэйдэрбитин таһааран кэбиһэрбит, онтон ынахтар кэлэллэрэ чугаһаатаҕына хотоҥҥо хаайталыырбыт. Мин сэттэ кылаастаах оскуоланы Харыйалаахха 1953 сыллаахха бүтэрбитим уонна ол күһүн субан сүөһүнү көрбүтүм. 1957 сыллаахха армияҕа ыҥырыллыбытым уонна 1960 сыллаахха демобилизацияламмытым. Онтон ылата холкуоска, совхозка 45 сыл үлэлээбитим. Холкуоска 7 сыл ыанньыксыттаабытым, 3 сыл фермаҕа биригэдьиирдээбитим, ол кэнниттэн хонуу үлэтигэр сылдьыбытым.1964 сыллаахха Харитонова Дора Ивановнаны кэргэн ылбытым, түөрт оҕолоох этибит, билигин үһэ баар. Кэргэмминээн 49 сыл  бииргэ олорбуппут, кини билигин суох. Сэттэ сиэннээхпин, тоҕус хос сиэннээхпин.