- Холкуостаах дьиэ кэргэнигэр тохсунньу ый 2 күнүгэр 1942 сыллаахха Анастасия Митрофановна уонна Роман Егорович дьиэ кэргэнигэр үһүс оҕонон Тойон Арыыга күн сирин көрбүтүм. Ийэм кэпсииринэн, алта ыйдаахпар аҕам Аҕа дойду  Улуу сэриитигэр ыҥырыллан барбыт, онтон төттөрү төрөөбүт дойдутугар төннөн кэлбэтэҕэ, сураҕа суох сүппүтэ. Онтон ийэбит барахсан үс оҕону көрөн-аһатан, улаатыннартаан баран эрдэ өлбүтэ.Ол кэнниттэн эдьийбитигэр Екатерина Митрофановнаҕа иитиллибиппит. 14 сааспыттан «Хрущев» холкуоска үлэлээбитим, сайынын от үлэтигэр, кыһынын түөрт ыанньыксыкка уу баһар этим. Армияҕа барыам инниттэн Павлов Григорий Алексеевич үөрэтэн тракторист буолбутум. Ол кэнниттэн 1960 сылтан «Правда» диэн холкуоска тракториһынан үтүө суобастаахтык үлэлээн 1996 сыллаахха пенсияҕа тахсыбытым. Орто дойду олоҕо, дьон дьоло ыалтан саҕаланар. 1973 сыллаахха дойдубар олоҕум аргыһын Петрова Евдокия Кузьминичнаны көрсөн дьолбутун холбоон Соколовтар диэн ыал буолан түөрт оҕону төрөппүппүт. Билигин түөрт сиэннээхпит. 1982 сыллаахха оройуон чемпион-тракториһа буолбутум. 1973 сыллаахха олохтоох сэбиэт депутатынан талыллан үлэлээбитим.