Кучурова Александра Николаевна

(1918-1997)

Байаҕантай улууһун 1V-с Байаҕантай нэһилиэгэр Ньолоҥсо диэн сиргэ төрөөбүтэ. 4 кылаас үөрэхтээх. Сэрии кэмигэр ыанньыксыт, сайынын от үлэтигэр сылдьыбыт. Кэлин пиэрмэҕэ учуотчут, маҕаһыыҥҥа, оскуолаҕа остуорас, балыыһаҕа повар. Бастакы кэргэнэ Туласынов Игнатий Леонтьевич Аҕа дойду Улуу сэриититтэн эргиллибэтэҕэ. Кинилэр түөрт оҕолоруттан Татьяна Игнатьевна Андросова, Игнатий Игнатьевич Туласынов бааллар. Иккис кэргэнэ Петр Михайлович Постников эмиэ сэрии кыттыылааҕа. Кинилэр алта оҕолоруттан Лидия Петровна Максимова, Дария Петровна Белолюбская бааллар. Ийэбит олоххо наһа көхтөөҕө, ыллыырын , оһуохайдыырын сөбүлүүрэ, дэриэбинэтин эбэлэрин түмэрэ. Оттон үлэһитэ, асчыта, иистэнньэҥэ, бары аймахтарын түмэрэ, оҕолоругар күүс-көмө буолара билиҥҥэ диэри кэпсэлгэ сылдьар. Улуу Кыайыы 75 сылыгар анаан ийэ, эбэ, хос эбэ, хос хос эбэ Александра Николаевна сырдык кэриэhигэр анаан “Эбэ Өлөксөөһө»  диэн кинигэни бэчээттэтэн таһааттараары сылдьабыт. Наҕараадалара: “Ийэ буолуу”мэтээлэ, “Аҕа дойду Улуу сэриитин кэмигэр килбиэннээх үлэтин иһин”, “Үлэ бэтэрээнэ”, үбүлүөйүнэй мэтээллэр.