Ийэм Копырина Мария Тихоновна ахтыытыттан:"Мин  Уус-Алдан оройуонун, I Өспөх нэһилиэгэр Дуонду алааска төрөөбүтүм.Бииргэ төрөөбүттэр бэһиэ этибит: Сэмэн (сэриигэ сураҕа суох сүппүтэ),Маайа,Баһылай,Кэтириинэ, Даша. Ийэбит Копырина(Лазарева) Наталья Константиновна, 1890 с.төрөөбүт, мин 10 саастаахпар, кыра балтыбыт Даша 3 саастааҕар өлбүтэ.Аҕабыт Копырин Тихон Семенович 1887 с.төрүөх, биэс оҕотун бэйэтэ иитэн улаатыннарбыта.12 саастаахпар дьонум ТСОЗ диэн табаарыстыба тэриммиттэрэ, барыта 5 буолан киирбиппит.Биир кунаммытынан сир хорутарбыт.Кэнники "Кыһыл сардаҥа" холхуос тэриллибитэ."Чабычах" диэн алааска Федоров Иван Федорович хотонугар ферма тэринэн олорбуппут.Бастаан утаа үһүө этибит Макарова Сөдүөрэ, Лыткин Дьөгүөр оҕонньор,миигин ыстааршай оҥорбуттара.Фермаҕа үлэлиирбэр 18 саастааҕым буолуо, миигин холхуостан ууратан Сэбиэккэ чилиэнинэн ылбыттара,Копырин Степан Николаевич Сэбиэт бэрэссэдээтэлэ буолбута.Сэкирэтээр "Үнүү" холхуос киһитэ Бочкорев Ылдьаа этэ.Үлэбит собуоткатын Өспөхтөн 3 көстөөх Томтор диэн сиргэ, сатыы киллэрэр этим.Сэрии бириэмэтигэр "Барыта фроҥҥа,барыта кыайыы туһугар" диэн ыҥырыыннан салайтаран күүрээннээх үлэҕэ туруммуппут.Сүөһүнү, сылгыны сүтүгэ суох сыл таһаарыы, балыктааһын былаанын толоруу, оборона фонугар  облигацияннан, уу харчыннан, харчы мал лотереятыгар төлөөн кылааппытын киллэрбиппит. Үлэ бөҕөтүн көрсүбүппүт'.Сэрии кэмигэр үлэм иһин "Аҕа дойдуну көмүскүүр Улуу сэрии 1941-1945 сс.килбиэннээх үлэтин иһин" Сталин төбөлөөх мэтээлинэн наҕараадаламмытым".