Лукинова Вера Ильинична 1920 сыллаахха, Нам улууһун Түбэ нэһилиэгэр Ильин Илья Петрович уонна Колесова Прасковья Степановна дьиэ кэргэннэригэр бастакы оҕонон күн сирин көрбүтэ. Ийэтэ 3 саастааҕар өлөн, 10-чатын ааһыар диэри эбэтигэр Прасковьяҕа Көбөкөҥҥө иитиллибитэ. Аҕата иккис кэргэннэнэн, 3 кыра оҕолонон баран биирдэ бэйэтигэр Түбэҕэ ылбыта. Онно аҕата, Илья Петрович, оскуолаҕа анаан туран биэрбит дьиэтигэр 3 кылааһы бүтэрбитэ. Үөрэҕин быыһыгар 2 быраатын, 1 балтын көрбүтэ-харайбыта. Кииринньэҥ ийэтэ өлбүтүн, ыһыллыы буолан аҕатын кулаак оҥороннор, куолаһын быспыттарын кэннэ, 14-15ээх кыыс эбэтигэр төннөн колхоз үлэһитэ буолбута. Окко, ыһыыга, сүөһү көрүүтүгэр үлэлии сылдьан, 1940 сыллаахха, 1 уол оҕолоох огдообо хаалбыт Лукинов Константин Гаврильевичка эргэ тахсыбыта.
1942 с. кэргэнэ Константин Гаврильевич II-с хомуурга хабыллан сэриигэ барбытыгар 5 саастаах уол, 6 ыйдаах кыыс о5олордоох хаалбыта. Сэрии ыар сылларыгар ыанньыксыттаабыта уонна ферма сэбиэдиссэйинэн үлэлээбитэ. Сайынын, от кэмигэр, ас астааччынан сылдьара. Бу олус эрэйдээх, быыччык уонна уустук үлэ этэ. Ас барыта кулуһун уотугар буһар буолан күөс өрөрүгэр уонна лэппиэскэ буһарарыгар кулуһунун маһын барытын бэйэтэ бэлэмниирэ. Аны уутун олус ыраах сиртэн солуурунан эмиэ бэйэтэ таһара үһү. Хас биирдии үлэһит аһын ыйааһыңңа ыйыы-ыйыы түңэтэрэ. Ас да а5ыйа5а, кырыымчыга. Хата, о5онньоттор өрүскэ киирэн балыктыыр буоланнар, ону эбинэллэрэ. Ферматтан суорат уонна иэдьэгэй ыытар буоланнар, оччуттар хоргуйбатахтар, өрүһүммүттэр. Ферма сэбиэдиссэйин үлэтэ өссө ыарахана: ыаммыт үүтү ыйыыра, оччуот оңороро. Үлэһит илии олох тиийбэт буолан ыалдьыбыт уонна аччыктаан сэниэлэрэ эстибит, күүстэрэ өһүллүбүт ыанньыксыттары мэлдьи бэйэтэ солбуйара. Эдэр, доруобай уонна инникигэ эрэл санаалаах эрэ буолан, ити ыар кэмнэри тулуйбута.
1970 сыллаахха пенсияҕа тахсыар диэри илиитин үлэттэн араарбатаҕа. 5 оҕону төрөтөн, улаатыннаран, элбэх сиэни, хос сиэннэри көрсөн, бүөбэйдэспит дьоллоох киһи. 7 сыл ыарахан ыарыылыын туруулаһан баран 2011 с. олохтон туораабыта.
Биһиги, үлэни эрэ өрө тутан иллээхтик олорбут, күндү дьоммут үтүө-сырдык мөссүөннэрин өйбүтүгэр-сүрэхпитигэр иҥэрэн, кинилэр олохторун салгыыбыт, үйэтитэргэ кыһаллабыт.
Оҕолоро, сиэннэрэ, хос сиэннэрэ
