Стручков Дмитрий Николаевич – I (Тойон Уол) 1891 сыллаахха Мэҥэ Хаҥалас оройуонун Доллу нэһилиэгин Күөлэрикитигэр төрөөбутэ. Аҕата Стручков Николай Петрович ( Кугастыыр Ньукулай) 1855 сыллаахха төрөөбүт, ийэтэ Олесовтар кыыстара. Бу ыал үс уоллаттардаахтар Хабырыыс, Буөтур, Миитэрэй. Биһиги эһээбит Миитэрэй кыралара. Миитэрэй бастакы кэргэниттэн Верховцева Февронья Михайловнаттан икки кыыстаах хаалбыт.
Ийэ дойдуну көмүскүүр улуу кыргыһыыга «Барыта фроҥҥа», “Барытын кыайыы туһугар” оборона көрдөбүлүн толоруу сорук тыылга хаалбыт кырдьаҕастарга, дьахталларга, оҕолорго сүктэриллибитэ. ЭҺээбит Тойон Уол сэрии сылларыгар кырдьаҕаһынан фроҥҥа ынырыллыбатах, огдообо эбит, тыылга хаалан балык биригээдэтин биригэдьииринэн улэлээбит. Иккис кэргэнэ Стручкова (Максимова)Дария Афанасьевна эмиэ балык биригээдэтигэр үлэлэспит. Дьокуускайдааҕы Рыбтрест сорудаҕынан Хотун Төҥүлү эбэ көмүс хатырыктааҕын, собо балыгы муҥхалаан куоракка кунустэри-түүннэри сыарҕалаах атынан илдьэн фроҥҥа көмө диэн туттараллар эбит. Оччолорго Хотун Төҥүлү балыга сүрдээх бөдөҥ уонна минньигэс. Муҥхатын кылынан бэйэтэ өрөн оҥосторо үһү.
Кини биригээдэтин таһаарыылаах үлэтин туһунан 1944 сыллаахха тохсунньу ый 22 күнүгэр «Кыым» хаһыакка маннык суруллубут: “Доллу нэһилиэгинээҕи Горькай аатынан колхоз балыксыта Дмитрий Стручков былааны таһынан бултаабыт 186 буут балыгын Кылаабынай командование фондугар туттарда. Кини бастакы кыбаартал сорудаҕын икки төгүлтэн итэҕэһэ суох толорорго соруктанар.”
Ити курдук кинилэр күнүстэри түүннэри , сарсыарда эрдэттэн киэһээ хойукка диэри, тымныыны итиини аахсыбакка күргүөмнээхтик туруулаһан туран үлэлииллэрэ. Ол курдук кыайыыны уһансыбыттара. Ону туоһулуур 1946 сыллаахха бэриллибит «Аҕа дойдуну көмүскүүр Улуу сэрии 1941-1945 сс. килбиэннээх үлэтин иһин» мэтээлэ.
Сэрии кэнниттэн кини эмиэ балыксыттар биригэдьиирдэринэн улэтин салҕаабыт. Ситиһиилээх үлэтин туһунан С. Максимов корреспондент 1948 сыл муус устар 2 күнүгэр «Колхоз кырдьыга» хаһыакка сурүйбут: «Балыксыттар саҥа туонаны буллулар. Доллу Дмитрий Стручков биригэдьиирдээх балыгы бултуур биригээдэ бастакы кыбартааллаах былаанын 240% толордо. Балыксыттар урут хаһан да муҥхаламматах Хаар утаарбыт диэн тыымпыттан 12 центнер балыгы бултаан государствоҕа туттардылар. Биригээдэ бастыҥ үлэһиттэринэн Говоров А., Максимов И. буолаллар.”
Бу сыл бэс ыйын 17 күнүгэр Доллу нэһилиэгинээҕи Горькай аатынан колхоз тэриллибитэ 20 сылын туолуутунан сибээстээн, колхоз чулуу производственниктарын уонна салайааччыларын оройуон Бочуоттаах дуоскатыгар таһаарага райсовет исполкома 22 чулуу үлэһиттэри быһаарбыт. Онно биһиги эһээбит Стручков Дмитрий Николаевич-I (Тойон Уол) эмиэ баарын туһунан «Колхоз кырдьыга» хаһыакка бэчээттэммит.
