Ийэбит, эбээбит, хос эбээбит Гаврильева Мария Николаевна, 1929 сыллаахха от ыйын 1 күнүгэр Кукаакы нэһилиэгин Мохулутугар Жондорова Александра Гаврильевна, Никифоров Николай Гаврильевич дьиэ кэргэнигэр үһүс оҕоннон төрөөбутэ. Ийэбит бииргэ төрөөбүт төрдүөлэр эбит, онтон кыра быраата оҕо сылдьан эмискэ ыалдьан өлбүт, убайа Баһылай сэрии саҕана эмиэ ыалдьан өлбүт. Убайа Гаврильев Николай Николаевич 1918 сыллаахха Кукаакы нэһилиэгэр төрөөбүт. 4 кылаас үөрэхтээх. «Чкалов» колхоз чилиэнэ. Колхозка биригэдьиирдээбит. Сэриигэ 1943 сыл от ыйын 20 күнүгэр ыңырыллыбыт. Карельскай фроҥҥа ытааччынан сылдьыбыт. Ыалдьыбытыгар 1945 сыл бэс ыйын 10 күнүгэр Ленинградскай пересыльнай пуун кинини дьиэтигэр ыыппыт. 1976с өлбүт. Аҕата Николай Гаврильевич сэрии кэмигэр Булуҥ оройуонугар Күһүүргэ үлэ фронугар, таһаҕас таһыытыгар үлэлээбит. Ийэтинээн иккиэйэҕин хаалан хаалбыттар. Сэрии кэмигэр от оттоһон, бурдук быһан, сүөһү көрсөн улахан дьону кытта тэҥҥэ үлэлэспит. «Чкалов» колхозка үлэтинэн тыылга кыайыыны уһансыбыта. Сэрии кэмигэр сир оҥоруутугар оҕус сиэтээччинэн, бурдук ыһыытыгар, быһааһыныгар, от оттооһунугар улахан дьону кытта тэҥҥэ араас ыарахан үлэлэргэ үлэлээбитэ.
1952 с. тохсунньутугар Ефремов Елисей Васильевичтыын ыал буолбута. Таптал биһигэр бигэнэн 6 оҕо күн сирин көрбүтэ.
1964 с. диэри колхозка сүөһү көрүүтүгэр үлэлээбитэ. Улэлии сылдьан ыалдьан улэттэн уурайбыта, дьиэтин, хаһаайыстыбатын көрөн олорбута.
1979 с. сааһынан пенсияҕа тахсыбыта.
Тыыл, улэ бэтэрээнэ. I-II истиэпэннээх Ийэ мэтээлинэн, Улуу Кыайыы үбүлүөйдээх мэтээллэринэн, тыыл ветеранын нагрудной знагынан наҕараадаламмыта.
Бу орто дойдуга ыал буолан, оҕо төрөтөн улаатыннартаан, ыал оҥортоон, сиэннэри, хос сиэннэри көрөн ытык иэспин толорон дьоллоох олоҕу олордум диир этэ.
2016 с. тохсунньу 30 күнүгэр күн сириттэн күрэммитэ.
Быйыл Улуу Кыайыы 75 сылын бэлиэтээри олорон, эйэлээх көҥүл олох иһин олохторун толук уурбут, Кыайыыны уһансыбыт, оҕо саастарын былдьаппыт төрүттэрбитигэр, аймахтарбытыгар, эһээлэрбитигэр, эбээлэрбитигэр муҥура суох махтанабыт! Кинилэр ааттарын үйэлэргэ сүрэхпитигэр илдьэ сылдьыахпыт!
Оҕолоро, сиэннэрэ, хос сиэннэрэ Ефремовтар, Соловьевтар, Ивановтар, Неустроевтар, Бурнашевтар, Степановтар, Самиевтар, Осиповтар, Протопоповтар. 2020сыл
