Бочкарев Николай Петрович 1921 сыллаахха тохсунньу 21 күнүгэр Уус Алдан улууһун Түүлээх нэһилиэгэр күн сирин кѳрбүтэ. Сулууспалыы барыаҕын доруобуйата мөлтөҕүнэн сыыйыллан, сэрии сылларыгар Түүлээх нэhилиэгэр балыксыттар биригэдэлэригэр үлэлээбитэ. Онтон кэлин 30 сыл Түүлээх колхоhугар үлэлээбитэ. 1974 сыл атырдьах ыйын 21 күнүттэн Герой Егоров аатынан Түүлээх сопхуоhугар оробуочайынан киирбитэ. Онтон сотору Түүлээх аҕыс кылаастаах оскуолатыгар кочегарынан үлэтин саҕалаабыта. Оннук 1981 сыл алтынньы 2 күнүгэр диэри пенсияҕа тахсыар диэри икки сиринэн үлэлээн кэлбитэ.  1985 сыл саас кыыhын Акулина дьиэ кэргэнин кытары Хаҥалас улууhун (оччолорго Орджоникидзевскай оройуон) Нѳмүгү бѳhүѳлэгэр кѳhѳн кэлсибитэ. Кэлин улаатан баран «Эhээ, ахтыыгын суруйуох», - диэтэххэ, кыыhыран «Туохха нааданый, оннукка эрэ тиийбэтэргит, билбэтэргит ордук буолуо», - диэн батынан хараҕа ыарымтыйан өлбөөрөн ылара. Сэрии сылларыгар олох-дьаһах туһунан адьас кэпсээбэт этэ.

Эһэм сэрии сылларыгар сыратын иһин 1947 сыллаахха балаҕан ыйын 5 күнүгэр Бочкарев Николай Петровиhы Түүлээх учаастагын балыксытын «1941-1945 Сэрии сылларыгар килбиэннээх үлэтин иhин» мэтээлинэн наҕараадаламмыта. 1975 сыл балаҕан ыйын 10 күнүгэр Аҕа дойду Улуу сэриитигэр Кыайыы 30 сылыгар үбүлүөйдээх мэтээлинэн наҕараадаламмыта. 1982 сыллаахха Саха АСРС Верховнай Советын ыйааҕынан «Үлэ бэтэрээнэ» мэтээли туппута. 1985 сыл ыам ыйын 8 күнүгэр Аҕа дойду Улуу сэриитигэр Кыайыы 40 сылыгар үбүлүөйдээх мэтээлинэн наҕараадаламмыта.

1995 сыл кулун тутар 22 күнүгэр Аҕа дойду Улуу сэриитигэр Кыайыы 50 сылыгар үбүлүөйдээх мэтээли Арассыыйа Президенэ Б. Ельцинтан уонна Саха Өрөспүүбүлүкэтин Президенэ М. Николаевтан туппута. Кэнники икки сиэн кыргыттарын (миигин уонна балтыбын) араҥаччылыырыттан, онтон хос сиэнин бүѳбэйдиириттэн күнэ-ыйа тахсара. Эһэм 2003 сыл атырдьах ыйын 11 күнүгэр бараахтаабыта, баҕатын хоту кыыһым сиэттэрим аттыларыгар диэн Нөмүгүгэ көмүллүбүтэ.