Биһиги ийэбит Ирина Васильевна Харлампьева 1914 сыллаахха Бүлүү улууһун II Чочу нэһилиэгэр күн сирин көрбүтэ. Дьадаҥы ыал оҕото кыайан үөрэнэр кыаҕа суох буолан үөрэммэтэх. 1934 сыллаахха аҕабытыгар Михаил Андреевич Харлампьевка кэргэн тахсан, кийиит буолан кэлэн,  Тамалакаан алааһыгар Аҕа дойдуну көмүскүүр сэрии буолуор диэри дьоллоохтук олорбуттара. 1943 сыллаахха аҕабыт сэриигэ ыҥырыллан барбыта. Ийэбит 4 оҕону кытта хаалбыта. Түүннэри-күнүстэри колхуоска үлэлээбитэ. Кыайан көрүүтэ суох буолан, биир ыйдаах кыыс оҕото төннөөхтөөбүтэ. Эһэбит барахсан балыктаан, куобахтаан хоргуппатаҕа.

Сарсыарда күн тахсыыта үлэлии барарбыт уонна киэһэ күн киириитэ дьиэбитин буларбыт диэн ийэбит барахсан кэпсээхтиирэ. Олорбут Тамалакаан алааһын дьонун-сэргэтин истиҥник ахтааччы. Төһө да элбэх оҕолоох буолбутун иһин ийэбит өрүү үлэ үөһүгэр сылдьыбыта. Сэрии бүппүтүн кэннэ хойут оҕо саада аһыллыбытыгар поварынан үлэлии сылдьан, биэнсийэҕэ тахсыбыта. Ийэлээх аҕабыт 50-тан тахса сыл бииргэ олорон, алта оҕону иитэн, үөрэттэрэн киһи гынаттаан олоххо суолбутун булларбыттарыгар сиргэ тиийэ сүгүрүйэбит! Билигин кинилэр ааттарын элбэх сиэн, элбэх хос сиэн ааттаталлар.