В тылу ковали Победу

 
 
Годы жизни: 1921-1976

Чарина Мария Васильевна, төрөппүттэрэ Василий Саввич уонна Мария Давыдовна Накатовтар. Аҕата байанайдаах булчут, улары ат ындыытынан бултуурун дьон-сэргэ ахтар. Холкуостаах, 7 кылаас үөрэхтээх, комсомол чилиэнэ. Сэрии сылларыгар хонуу үлэтигэр, ааҕар балаҕан сэбиэдиссэйинэн үлэлээбитэ. 1948 сыллаахха "1941-1945 сс. Аҕа дойду Улуу сэриитин кэмигэр килбиэннээх үлэ иһин", "Ийэ буолуу" I, II истиэпэннээх мэтээллэринэн наҕараадаламмыта.

Ийэбит бииргэ төрөөбүт ахсыалар. Олорбут сирдэрэ Ньарандаайыга Сурт Күөлүйэтэ, Силип Сайылыга, Саҥа Балыктаах, кэлин Сааба Күөлэ буолаллар. Оскуолаҕа Томторго үөрэммитэ. Учуутала Марина Александровна этэринэн, ийэбит актыыбынай комсомолка, баһаатай эбит.

"Сэрии сылларыгар холкуоска үлэлээн, сут-сутурҕан сылларын эрэйинэн туораабыппыт. 1942-1943 сыллар наһаа ыарах этилэр, элбэх киһи суорума суолламмыта. Сут дьылыгар бурдукпут бүтэн, Сурт Көлүйэҕэ олорон, хоргуйан өлө сыспыппыт. Аҕабыт Баһылай уолун Саабаны, кыра кыыһын Таняны илдьэ балыктыы барбыттара. Эдьиийбит Улахан Маайа, Аана, мин оронтон турбат буолбуппут, онно Улахан Маайа нэһиилэ туран, уотун оттон, эргэ тайах тириитин куйахалаан, буһаран сиэппитэ да, улаханы туһалаабатаҕа. Балтыбыт Таня Бүтэйдээхтэн талах тымтайга собо аҕалан, ону үссэнэн өрөһүммүппүт. Ити кэнниттэн оҕонньоттор балыктаан, көлөһүн күнүн балыгынан биэрэннэр, элбэх киһи тыыннаах хаалбыта. Убайдарым Арамаан, Балыкаар бурдугу салаасканан таһыыга иккилии куулу аҕалан, улахан нуорманы ылан абырыыллара. Сэрии кэнниттэн Чарин Иван Иосифовичка кэргэн тахсыбытым, бастакы оҕом Бүөккэ Бараан Кыыска пиэрмэҕэ кыстаан олордохпутуна оһолго өлбүтэ" - диэн ийэм Мария Васильевна сэрии сылларын хараастаан олорон ахтара.

Ийэбит сир аһын хомуйарын наһаа сөбүлүүрэ. Ол курдук дьахтар бөҕөтүн хомуйан, хотоҕос курдук субуллан, дьордьумалыы, отоннуу бараллара, ол быыһыгар бытырыыс курдук оҕо буолара. Дьүөгэлэрэ "Маайаны кытта бардахпытына, сир аһын булабыт" диэн үөрэллэрэ. Тыаҕа тахсан, мунаара турарын төрүт өйдөөбөппүн. Таһаарбыт дьонун барыларын барыларын хомуйан илдьэ сылдьара. Сут-кураан, сэрии, аччыктааһын, ыарахан үлэ таайан, сүрэҕинэн ыалдьан, охто сылдьар буолбутун, Куомаҕа эмтэтэн, үтүөрэн, кэнники иккитэ оҕоломмута. Бэкээринэҕэ остуорастаан, быыһыгар куул тэбээн эбинэрэ.

Оҕолорун ахтыыларыттан.

Место рождения: Баягантайский улус, Баягинский наслег
ПОДЕЛИТЬСЯ СТРАНИЦЕЙ