Алексеева (Самсонова) Матрена Петровна (01.07.1931-02.12.2002) 1 Күүлэт нэһилиэгэр, Бүлүү оройуонугар, Самсоновтар дьиэ кэргэҥҥэ алтыс оҕонон төрөөбүтэ. Эрдэ тулаайах хаалан эдьиийин Татьянаны батыһан көстөөх сиртэн сылдьан үөрэнэн 4 кылааһы бүтэрбитэ. Эйэҕэс, толоругас, кытыгырас үлэһит кыыс колхуос үлэтигэр улахан дьону сэргэ үлэлэһэн барар. Элбэх сыл фермаҕа поварынан, салгыы сельсовет секретарынан үлэлиир, олохтоох комсомольскай тэрилтэ комитетын үлэтигэр көхтөөхтүк кыттыбыта. Олоҕун доҕоро Христофор Даниловичтыын Ньурбанан, Бүлүүнэн олохсуйан олорбуттара, үлэлээбиттэрэ. Христофор Данилович киһи гиэнэ үтүөтэ этэ, өр сылларга милицияҕа следователинэн, начальнигынан үлэлээбитэ. Бүлүү куоратын, улууһун советын секретарынан үтүө суобастаахтык үлэлээбитэ, дьон-сэргэ ытыктабылын ылбыта. Матрена Петровна пенсияҕа тахсыар диэри оройуоннааҕы киин балыаһа бухгалтериятыгар кассирынан үлэлээбитэ. Бүлүүгэ олорон Самсоновтар аймахха улаханнык күүс-көмө, өйөбүл буолбута. Ким үөрэнэр, кэлэр-барар эдьиийбит алгыһынан, сүбэтинэн сылдьарбыт, онон ытыктаан "маама Мотя" диирбит, - диэн ахтар балта Мария Алексеевна.      Мотрена Алексеевна сыралаах үлэтэ "Тыыл ветерана", үбүлүөйнэй мэтээллэринэн наҕараадаламмыта. Кини сырдык олоҕун кыыһа, сиэннэрэ, хос сиэннэрэ дьоһуннук салгыыллар. Улахан сиэнигэр сэриигэ өлбүт убайын кэриэстээн Никифор диэн ааты иҥэрбитэ. Билигин Никифор Валерьевич Бүлүү улууһун администрациятын тутаах үлэһитэ, олох салҕанар.