Гоголева Мария Терентьевна – 1928 сыллаахха Томпо улууһун Дабаччыма сиригэр төрөөбүт. Аҕата- Булдаков Терентий Иосифович, ырыаһыт-тойуксут, үлэһит үтүөтэ этэ.  Ийэтэ- Сайдыыттан төрүттээх Захарова Матрена диэн этэ. 12 оҕоттон 2 эрэ кыыс тыыннаах хаалбытын, абааһыттан куоттаран, иккиэннэрин Маайа диэн ааттаабыттар. Эрдэ тулаайах хаалан, детдомҥа иитиллибиттэр. Кэлин Марияны Ковлекова Анна Николаевна ылан ииппит. Сэрии саҕаланарыгар 13-тээх кыыс холкуос бары үлэтигэр эриллибитэ, аччыктыырым диэн ахтара, үүт күүгэнин да тыыттарбаттар эбит. «Аҕа дойду  Улуу сэриитигэр 1941-1945 сс. килбиэннээх үлэтин иһин» мэтээлинэн наҕараадаламмыта. Эйэҕэс майгылаах, элбэх кэпсээннээх, түргэн туттуулаах, барыга көхтөөх, иистэнньэҥ, асчыт бэрдэ этэ. Соло буллар эрэ оҕолорун кытары дуобаттыыра, кинигэ ааҕара.  Кыһалҕалаах дьоҥҥо куруутун көмөлөһөрө. Кылынан быа хатара, сиидэ өрөрө. Уус уран самодеятельноска кыттара, ыллыыра. Гоголев Гаврил Дмитриевичтиин ыал буолан, 7 оҕоломмуттара. Кэргэнэ сылгыһыт этэ, ол иһин туох баар таҥаһын бэйэтэ тигэрэ, ат тэрилигэр тиийэ,  сэтиитин, бас быатын, сөрүөнү барытын оҥороро. 1984с бэс ыйын 16 күнүгэр бу олохтон барбыта.