Пахомова Татьяна Семеновна 1927 сыллаахха  I Наахара нэһилиэгэр бэс ыйыгар күн сирин көрбүтэ. Үс бииргэ төрөөбүттэрдээҕэ, Мария Семеновна Сидорова, Алексей Семенович Пахомов. Төрөппүттэрэ эрдэ өлөн, тулаайах хаалан, эбэлэригэр иитиллибиттэрэ. Сэрии, сут сыллара мэҥэстэн, кыыс үөрэммэтэҕэ. Онон Хомустаах, кэлин Киров аатын ылбыт холкуоска араас үлэни үлэлээбитэ. Холкуостар бөдөҥсүйбүттэрин кэннэ дайаарканан уһун кэмҥэ үлэлээн пенсияҕа тахсыбыта. Ыраах учаастактарынан сылдьан үлэлээбитэ: Суола, Хомпу быһытын тутууга, Хомустаах, Кэҥэримэ икки ардыларыгар почта (хаппыраал) таһааччынан, Кэҥэримэ-Хомпу буор суолун тутуутугар солооһуҥҥа. Тиэлигигэ “Хомпу” ферма старшайынан үлэлээн, үүтү ыаһыҥҥа коллективынан үрдүк таһаарыылаахтык үлэлээбиттэрэ. Үчүгэй үлэтин иһин холкуос, сопхуос салалтата элбэх бочуотунай грамоталарынан, махтал суруктарынан, райком, райсовет грамоталарынан бэлиэтээбитэ. Юбилейнай мэтээллэринэн наҕараадаламмыта. Үлэ, тыыл бэтэрээнэ, Сталин мэтээллээх, стахановец, Коммунистическай үлэ ударнига, биир фуражнай ынахтан 2500 - 3000 кг  үүтү ыан, Карл Байкалов аатынан сопхуос чемпион ыанньыксытын  аатын ылбыта, соҕуруу күүлэйдии барар путевканан наҕараадаламмыта. Нэһилиэк сэбиэтин депутатынан хас да төгүл быыбарданан, нэһилиэк сайдыытыгар күүс-көмө буолбута. Тыыл, үлэ бэтэрээнэ. Татьяна Семеновна дьоҥҥо-сэргэҕэ дириҥ ытыктабылынан туһанара, ылыннарыылаах тыллааҕа, дьаһаллааҕа. Кыраҕа-кыаммакка куруук көмөлөһөрө.                                                                                       

Татьяна Семеновна соҕотоҕун үс төрөппүт уолун атахтарыгар туруортаан, үөрэттэрэн, олох киэҥ аартыгар таһаартаабыта. Сиэн оҕолорун бүөбэйдэспитэ.   2001 сыллаахха ыалдьан бу олохтон барбыта.

Кийиитэ Н.В.Пахомова суруйуута.