Сэрии ыар сылларыгар мин ийэлээх аҕам бэйэлэрин харыстаммакка, күүрээннээх үлэлэринэн кыайыыны уһансан, эйэлээх олох чэчирии сайдарын туһугар үлэлээбиттэрэ. Сэрии сылын оҕолоро буоланнар, улахан дьону кытта тэбис тэҥҥэ бары күүһү фронт туһугар, өстөөҕү үлтүрүтүү туһугар күүстээх сыраларын уурбуттара. Хомойуох иһин, ол ыар сыллар дьайыылара кинилэр доруобуйаларыгар охсон, дьонум барахсаттар күн сириттэн эрдэ барбыттара.
Кинилэр харахтарынан хайҕаһан, сүрэхтэринэн сөбүлэһэн, ыал буолан, алта оҕону төрөтөн, иитэн атахтарыгар туруорбуттара. Иккиэн ыраас дууһалаах, сырдыгы эрэ ыралыыр, дьоҥҥо ытыктабыллаах сыһыаннарын билигин да дьон-сэргэ истиҥник саныыллар. Кыраттан да үөрэллэрэ, дьоҥҥо ис дууһаларыттан үтүөнү оҥороллорун сөбүлүүллэрэ. Биһигини эмиэ олоҕу таптыырга, олох кэрэтин кыраҕа да көрөргө үөрэппиттэрэ.
Аҕам Черемкин Петр Гаврильевич бэс ыйын 26 күнүгэр 1930 сыллаахха Кириэс Майыарга төрөппүттэригэр бастакы оҕонон күн сирин көрбүтэ. Кириэс Майыар начаалынай оскуолатын 4 кылааһын бүтэрэн баран, сэрии ыар сыллара саҕаланан ситэ үөрэммэтэҕэ. Кини 11 саастаа5ар аҕатын кытта фронт туһугар диэн кыһын булка сылдьара, сайын колхозка оттуура.
Кэлин каадырабай булчутунан, «Майыар» совхозка таба биригэдьииринэн, табаһытынан пенсияҕа тахсыар диэри үлэлээбитэ. Пенсияҕа да тахсан баран, үлэттэн уурайбатаҕа. Наставник табаһытынан, каадырабай булчутунан олоҕун тиһэх күннэригэр диэри үлэлээбитэ.
Аҕам ССКП чилиэнэ, общественнай олоххо куруук кыттар этэ. Нэһилиэк норуодунай хонтуруолун бэрэссэдээтэлинэн, партия райкомун бюротун чилиэнинэн, нэһилиэк Сэбиэтин депутатынан хас да ыҥырыыга талыллан үлэлээбитэ. Булчуттар обществоларын Бочуотунай кинигэтигэр киллэриллибитэ.
Аҕам 1947 сыллаахха «1941-1945 сылларга А5а дойду Улуу сэриитигэр килбиэннээх үлэтин иһин» Сталин моссуоннээх мэтээлинэн наҕараадаламмыта. «Үлэ бэтэрээнэ» анал ааты ылбыта. Кыайыы 30 уонна 40 сылыгар «30 лет Победы в Великой Отечественной войне», «40 лет Победы в Великой Отечественной войне» мэтээллэринэн наҕараадаламмыта.
Аҕам 1989 сыллаахха 58 сааьыгар олохтон барбыта.
Ахтыыны суруйда кыыһа Лидия Черемкина.
