Көһүүттэн этэҥҥэ дойдутугар эргиллэн кэлэн баран, салгыы Алаҕар 8-с кылаастаах оскуолатын бүтэрбитэ. Механик-суоппар идэтин ылан,  Уус-Алдан оройуонун Бэйдиҥэ бөһүөлэгиттэн төрдүлээх Варвара Афанасьевналыын (1932-1979) ыал буолан Бороҕонҥо олохсуйбуттара. 2 кыыс, 2 уол оҕоломмуттара. Төрөппүттэрбит иккиэн Бороҕонҥо оройуоннааҕы ветстанцияҕа үтүө суобастаахтык суоппарынан, лабораанынан үлэлээбиттэрэ.

Оҕо сааһын доҕоро, Чурапчы көһүүтүн кыттыылааҕа Баишев Алексей  Семенович М.И.Оконешников «Лампаарыкылар. Олох кырдьыга» (Дьокуускай, 2013) кинигэтигэр аҕабыт туһунан маннык ахтан суруйар: «1944 сыл сайын дойдубутугар көһөн кэлэн от үлэтэ буолуор дылы оҕолор ходуһа ыраастааһыныгар, чочунаах үргээһинигэр күн аайы барар этибит. Чочунааҕы соҕотуопкалаан-тууһаан фроҥҥа ыыталлар диир этилэр. Сайын от үлэтигэр көмөлөһөн баран, күһүн оҕолор бааһына харабыллааһыныгар, моҕотойдооһуҥҥа, бурдук итигэстээһинигэр, түүтэх бурдугу сонуоктан таһыыга атырдьах ыйын 28-29 күннэригэр дылы үлэлиир этибит. Оччотооҕу оҕолор төһө да кыра буолларбыт үлэҕэ эриллэн улааппыппыт. Никифор, Илья, Володя Баишевтар, Ваня, Коля Оконешниковтар, Вася Лыткин, Вася Ефимов у.д.а. уолаттар ситэн-хотон, араас идэлэри баһылаан дьон бэртэрэ, үлэһит үтүөлэрэ буолбуттара.

Баишев Владимир Александрович – саамай быһый, саамай моҕотой эккирэтээччибит. Сайыны быһа атах сыгынньах сылдьара. Атаҕын тириитэ халыҥаан этэрбэстээх курдук сүүрэрэ-көтөрө. Сайылык ынахтарын барытын билэрэ. Бэл, ынахтар хайдах быһыылаах туйахтаахтарын кытта арааран билэрэ. Ынах сүттэҕинэ, дьэ, ол туйаҕын суолунан көрдөөһүҥҥэ сирдьит кини буолара...»  

Аҕабыт уопсайынан барытыгар дьоҕурдааҕа: чэпчэки илиилээх буолан, ыаллара ыҥыран, борооскуларын киниэхэ аттаталлара; массыынаны начаас өрөмүөннээн бүтэрэрэ; иллэҥ кэмигэр бултуура; үчүгэйдик уһанара, кини оҥортообут хомуода, төгүрүк остуола, ыскааба  билигин да баар...

София Владимировна Рожина, кыыһа,

«Үлэ ветерана»,

Уус-Алдан улууһа, Бороҕон с.