Ийэм Стручкова (Лыткина) Татьяна Алексеевна 1924 сыллаахха Чурапчы оройуонугар Чаачыгыйга Лыткин Алексей Сидорович уонна Лыткина (Макарова) Наталья Семеновна дьиэ кэргэнигэр бастакы оҕонон төрөөбүтэ.
Аҕа дойду Улуу сэриитин кэмигэр 1942 с. ийэтин уонна икки быраатын 11 саастаах Гаврилы, 5 саастаах Сидоры кытта Чурапчы көһүүтүгэр Кэбээйигэ утаарыллыбыттара. Ийэтэ хоргуйан өлөн бырааттарын детдомҥа ылбыттара. Икки кыһын балык булдугар үлэлээн, үлэ ыараханын, тоҥууну – хатыыны, аччыктааһыны тулуйан, 1944 сыллаахха чаачыгыйдары кытта төннөн кэлбиттэрин, Алаҕар нэһилиэгэр ылбакка, чаачыгыйдар сирдэри – уоттары Мэҥэ – Хаҥалас оройуонун Дьабыыл нэһилиэгэр холбоһоллор. Ийэм онон Киров колхуос ыанньыксыта буолар. 35 сааһыгар чугаһаабыт Стручков Степан Никифорович диэн огдообо, биир кыыс оҕолоох киһи ыйыттарбытыгар кэргэн тахсан, Нуораҕана Арҕаа баһыгар сүктэн кэлэр.
Ийэм бастакы соругунан бырааттарын булуу буолбут. Аҕам хас да детдому кэрийэн, иккиэннэрин булан, таайым Хабырыыс сүөһу көрүүтүгэр, үүт тутааччынан, тырахтарыһынан таһаарыылаахтык үлэлээбитэ. Дьабыылтан 1963 с. Төҥүлүгэ көһөн тырахтарыыһынан, моториһынан, тарбахха баттанар токарынан үтүө суобастаахтык үлэлээбитэ. Партия чилиэнэ, үлэ ударнига. Ыал буолан 6 оҕону төрөтөн , атахтарыгар туруортаабыта. Иккис таайбын Сидор Алексеевиһы Алдаҥҥа үөрэттэрэн, онтон СГУ бүтэрэн геолог идэтин ылан, биэнсийэҕэ тахсыа диэри үлэлээбитэ. 2006 сыллаахха ыарахан ыарыыттан олохтон туораабыта, кини олоҕун үс оҕото уонна сиэннэрэ салгыыллар.
Ийэм аҕабынаан 6 оҕону төрөтөн, биэнсийэҕэ тахсыар диэри доярканан, уһуннук ыччат сүөһүнү көрөөччүнэн үтүө суобастаахтык үлэлээбитэ. Коммунистическай улэ ударнига, Ленин 100 сааһынан мэтээллэх. Ийэм барахсан үлэтигэр олус эппиэтинэстээх этэ. Ньирэйдэрэ ыарыйдаҕына, дьиэтиттэн балык буһаран, от уутун оргутан киллэрэрэ.
Ийэм өр сылларга Гоголева Матрена Денисовналыын, Петрова Дария Даниловналыын, Свешникова Федора Ивановналыын, Петрова Мария Васильевналыын, Никитина Татьяналыын алтыһан үлэлээбиттэрэ. Сайын аайы сайылыкка көһөллөрө.
Ийэм барахсан сэрии кэминээҕи ыарахан олоҕо таайан, баара – суоҕа 56 сааһыгар орто дойдуттан бараахтаабыта.
Улахан кыыһа Петрова Варвара Степановна
Педагогическай үлэ ветерана,
Дьабыл нэһилиэгин бочуоттаах олохтооҕо.
