Петров Василий Васильевич (Тириэтэй) Буоҕан сайылыктанан, Хаччыыта  халдьаайытыгар  кыстыктанан олорбут Василий Васильевич I (Күттүгүнэй) уонна Парасковья Ивановна Петровтар дьиэ кэргэннэригэр 1909 с. төрөөбүт. Икки кылаас үөрэхтээх этэ.

1934-1936 сс. А.В. Косарев аатынан шахтаҕа Алдаҥҥа үлэлээбитэ. Саамай күөгэйэр күнүн оройугар сылдьан үлэ бөҕө үлэлээн Коммунистическай үлэ ударнигын аатын ылан кэлбитэ.

Ааллаах Үүнҥэ таһаҕас таһыытыгар сылдьыбыта.

1943 сыллаахха армияҕа ыҥырыллан Забайкальскай байыаннай уокурукка Бурятиянан, Монголиянан, Иркутскайынан 7 нүөмэрдээх сылгы депотугар үлэлээбитэ. Сэрии бүппүтүн кэннэ кэлэн иһэн ,айанныыр харчы булаары тутууга үлэлии сылдьан, үөһэттэн охтон түһэн балыыһаҕа киирбит. Онно сытан дьиэтигэр кыайан кэлэр кыаҕа суох буолан, дьон көмөлөһөн Кыым хаһыакка биллэрии ыыппыт. Хата, ону балта таба көрөн ааҕан (оччолорго хаһыакка үлэлиир эбит) баран 1947 с аҕалбыттар.

Тириэтэй Баһылай дойдутугар кэлэн чөлүгэр түһэн нэһилиэк чулуу үлэһитэ буолбута. Киров аатынан  холкуоска тутуу биригээдэтигэр үлэлээбит. Кини барыны сатыыр мындыр уус, балыксыт, хоһуун хонуу үлэһитэ. Элбэх ыалга дьиэлэрин тутуспут өҥөлөөх. Куруук саҥаны, аныгыны сэҥээрэрэ, дьон убаастабылыгар сылдьара. Майгытынан – суобаһынан, чиэһинэйинэн, аймаҕымсаҕынан дьиҥнээх уу сахалыы киһи этэ.

Кэргэнинээн Анастасия  Платоновналыын (Варламова) 3 уол, икки кыыс оҕону төрөтөн олоҕун салгыыр ыччаттардаах.