В тылу ковали Победу

 
 
Годы жизни: 1914-..11.1983

Биһиги аҕабыт Петр Константинович төрөппүт аҕатынан Мэҥэ улууһун I Мэльдьэхси нэһилиэгин «Ньыппараах» аҕа ууһугар киирсэр. Кини төрүттэрэ кыһынын Лена өрүскэ баар «Эһэлээх»  арыыга, сайынын «Титииктээх» сайылыгынан олорбуттар.

Мин эһэм Константин Иванович Шарин эдэр сааһыгар (30-тан тахсаат) сөтөл ыарыытыттан өлбүт. Өлөрүгэр кэргэнигэр Попова Вера Ивановнаҕа кэриэһин маннык диэн эппит: «...уолаттаргын, сүөһүлэргин илдьэ бэйэн дьоҥҥор Мэлдьэхсигэ көһөөр». Онон эбээбит I Мэльдьэхси нэһилиэгэр «Хаар балаҕанҥа» олохтоох ийэлээх аҕатыгар Иван Алексеевич Поповка өрүстэн көһөн тахсыбыт. Ити кэмҥэ 3 саастаах уонна 1 саастаах игирэ уолаттардааҕа. Онон биһиги аҕабыт аах 1915 сыллаахтан таайдарын оҕолорунаан бодоруһан улааппыттар: Дьэбдьиэй, Маайа, Куола, Миитэрэй, Сэмэн, Ааныска, Мотуруона, Боойо.  1927-30 сылларга ыаллар холбоһоннор табаарыстыбалар, онтон  холкуостар тэриллибиттэр.        

Аҕабыт «Үүнүү» холкуоска кыра эрдэҕиттэн ыанньыксыт ийэтигэр көмөлөһөрө, ньирэйдэрин көрсөрө. Оччооҕу оҕолор курдук улахан дьоҥҥо барытыгар көмөлөһө улааппыта: сайынын сарсыарда эрдэттэн бастакы туман түһүөр дылы окко сылдьан, оҕуһунан отчуттарга суорат, лэппиэскэ таһан, бурдук быһылыннаҕына түүтэх баайан, соломонон быа бэлэмнээн. Күһүнүн сир паардааһыныгар түүннэри оҕус сиэтэн, миэлиҥсэҕэ бурдук таттарыытыгар түүннэри оҕус үүрсэн.

Эбээбит Вера Ивановна барахсан, огдообо да буоллар, оҕолорун оскуолаҕа үөрэттэрэн, аҕабыт салгыы бухгалтер идэтин ылбыт.

1950 сылларга Майаҕа «Союзпечать» тэрилтэтигэр үлэлии сылдьан ийэбитинээн  Варвара Егоровналыын ыал буолан 5 уол, 2 кыыс оҕоломмуттара. Бииргэ төрөөбүт игирэтин аҥара Павел Константинович Аҕа дойду уоттаах сэриититтэн төннүбэтэҕэ, сураҕа суох сүппүтэ. Убайа Никита Константинович «Үүнүү» холкуоска бостуугунан үлэлээбитэ, ыал буолан 2 кыыс, 1 уол оҕоломмуттара. Кини кыаҕа, күүһэ тиийэринэн тыылга кыайыыны уһансыбыта. Пенсияҕа тахсыар дылы Мэҥэ-Хаҥалас оройуонун «Союзпечать» тэрилтэтигэр бухгалтерынан, кылаабынай бухгалтерынан үтүө суобастаахтык үлэлээбитэ.Үлэтигэр биир да мүнүүтэ хойутаабат, олус кыраһыабай, аккуратнай (каллиграфическай) буочардаах этэ. Сытыары сымнаҕас майгылааҕа, олус чэнчис этэ.

 «Аҕа дойдуну көмүскүүр Улуу сэрии 1941-1945 сылларыгар килбиэннээх үлэтин иһин» мэтээллээх аҕабыт Петр Константинович Мэҥэ-Хаҥалас оройуонун «Союзпечать» тэрилтэтин «Социалистическай күрэҕин кыайыылааҕа» буолбута. Сыралаах, таһаарыылаах үлэтин түмүгэр «Союзпечать» тэрилтэ грамоталарынан, махтал суруктарынан, «Ветеран труда СССР» бэлиэнэн, «В.И.Ленин юбилейнай»  мэтээлинэн наҕараадаламмыта.

Шарин Эдуард Петрович, уола,

Мэҥэ-Хаҥалас улууһа, Майа с.

Место рождения: I Мелжехсинский наслег Мегинского улуса
ПОДЕЛИТЬСЯ СТРАНИЦЕЙ