Ушканов Спиридон Григорьевич Кукаакы нэһилиэгэр, Чуучукаан диэн сиргэ 1932 сыллаахха күн сирин көрбүт. Онтон Маалыкайдааҕы Бордоҥ нэһилиэгэр кадровай булчутунан, сопхуоска араас үлэни барытын үлэлээбит: харамынайынан, уут эрийээччиннэн, онтон биэнсийэҕэ тахсыар диэри тутууга үлэлээбит.
Спиридон Григорьевич кыыһын Анастасия Спиридоновнаны кытта сыньалаҥнык олорор. Оҕо сааһыттан улахан дьону кытта ыарахан үлэҕэ мускуллан улааппыт тыыл бэтэрээнэ оччотооҕу ыарахан күннэр-дьыллар тустарынан бу курдук ахтар: “1943 сыллаахха уон саастаахпар убайым Афанасий сэриигэ барбыта. Сэрии буолтун кэннэ оччотооҕу оҕолор кыһалҕата суох оҕо саас диэн тугун билбэккэ, улахан дьону кытта үлэ үөһүгэр түспүппүт. Кыһынын пиэрмэҕэ, сайынын окко сылдьыбытым. Ол эрээри ордук улахан дьону кытта булка сылдьарым. Кырабыттан улахан булчуттара кытары тэҥҥэ сылдьан кадровай булчукка тиийэ үүммүтүм. Сэрии кэнниттэн улахан кыраамата кэлбитэ, ону эдэр киһи буолан харыстаан уурар игин диэн өйбөр киирбэтэх. Онтон 1945 сыллаахха Маалыкайтан 30 көстөөх Хаймыйа диэн бултаах-алтаах үтүө сиргэ балыктааһыҥҥа ыыппыттара. 1948 сылга диэри онно балыкка сылдьыбытым. Биир дьоллоох кэмим өйбөр сырдык түгэн буолан хатаммыта. Дьэ, 1945 сыллаахха фашистары кыайбыт сурахпыт көтөн кэлбитэ, оо үөрбүппүтүөн. Онтон, ол сыл күһүнүгэр убайым Афанасий сэрииттэн кэлээт, миигин көрсөөрү үргүлдьү Хаймыйаҕа кэлбитэ. Мин убайбын көрөн баран, үөрүүбүттэн саҥабыттан матан турбутум. Оо, дьолломуппуон! Убайым онно биһигини кытта балыктаан, үлэлээн, ахтылаҕанын таһааран барбыта. Онтон 1952 сыллаахха бөдөҥсүйүү буолбутугар Маалыкайга көһөн киирбиппит. Мин саҥа ыал буола сылдьар кэмим. Кэргэмминээн Александралыын, төрөөбүт нэһилиэкпит чэчирии сайдарын туһугар үлэ үөһүгэр оройбутунан түспүппүт. Булка да сылдьарым, кэргэмминээн пиэрмэҕэ үлэлиирбит. Онтон уһанар дьоҕурдаахпын таба көрөннөр, дьиэ тутааччылар биригээдэлэригэр ыҥыранүлэлэппиттэрэ. Онтон Сойуус саҕана тыа сирэ саамай сайдар кэмигэр, үс нэһилиэккэ биир улахан пилорама үлэлэппиттэрэ. Онно биэнсийэҕэ тахсыахпар диэри үлэлээбитим”.
Спиридон Григорьевич 70-ча сиэннээх, хос сиэннээх. Кини ыччаттарым улаатан киһи хара буолалларын көрөр баҕалаахпын, онон Кыайыы 80 сыллаах үбүлүөйүн көрсүөм диэн эрэллээхпин диир.
