Эһэбит Василий Кириллович ийэтэ эрдэ өлөн, Аҕа дойду сэриитэ саҕаланарыгар 10 саастаах, балта Дьэлиэнэ 7 саастаах соҕотох аҕалара Кирилэлиин хаалбыттар. Төһө да кыра оҕо саастаннар, үлэ күнэ аахсаары “Чкалов” колхоһугар кыайар үлэтигэр кыаҕа тиийэринэн үлэлээбит. Эһэбит: “ Сэрии уот кураан мэҥэһиктээх кэлэн,олус алдьатыылаах этэ. Хоргуйуу, сутааһын үгүс колхуоһу таарыйбыта. Сэрии амырыын сылларын инчэҕэй тирбэҕэ быстыбатынан туораабыппыт. Наар аччык сылдьарбыт. “Саатар биирдэ тото аһаабыт киһи”,-диэн баҕа санаалаах этибит.диэн ахтара. 1945 сыл колхоһуттан көҥүллэтэн, Маалыкайга баран, оскуолаҕа дьэ киирэн интэрнээт оҕото буолбут. Салгыы Марха орто оскуолатын 1954 сылга бүтэрэн, биир сыл Дьаархаҥҥа бибилиотекаҕа үлэлээн харчы мунньунан, Дьокуускайга учуутал институтугар саха тылын уонна литературатын учууталыгар туйгуннук үөрэнэн 1959 сыллаахха бүтэрбит.
Үлэтин бастакы сылын Ньурбаҕа хаһыат үлэһитинэн саҕалаабыт. Онтон эбэбитин Елена Васильевнаны кэргэн ылан Малдьаҕарга, онтон Маалыкайга совзозка биригэдьииринэн, партийнай тэрилтэ секретарынан үлэлээбит. 1962 сылтан Маалыкай орто оскуолатыгар саха тылын уонна литературатын учууталынан үлэлээн 1998 сыллаахха үлэлээн бүтэр. 32 сыл тохтоло суох элбэх үөрэппит оҕолоругар төрөөбүт тыл сүмэтин иҥэрэн, сүрэҕин сылааһын анаан, чахчы да Улахан, тапталлаах учуутал аатын сүкпүт. Кини суолун батан саха тылын учуутала буолбут үөрэнээччилэрин ахсаана элбэх. Үлэлээбит үтүө кэмнэрин туоһута Бочуоттаах Грамоталар, “ РФ норуотун үөрэҕириитин туйгуна” бэлиэтэ кэрэһэлииллэр.
Эһэбит уйан дууһалаах хомоҕой хоһоонноох лирик-поэт, сытыы тыллаах публицист-очеркист этэ. Оройуон уонна Республика хаһыаттарыгар очеркалара, айымньылара тахсыбыттара. Олохтон барыар дылы, халыҥ таастааз лупанан сирдэтэн санааларын тиһэн ыыта олорбута. Тыыннааҕар Ньурбаттан төрүттээх композитор Полина Иванова мелодия айбыт “Күөрэгэй” диэн хоһоонун саха биллиилээх ырыаһыта Анегина Ильина ыллаан өрө көтүппүтэ. Хоһоонун тылынан “Күөрэгэй” диэн дьоҕус хомуурунньугун Степан Васильев сылгы собуотун директора Нестер Климович Антонов үбүлээн тахсыбыта. 2000 сылларга “Бичик” кинигэ издательствотын директора Август Васильевич Егоров көмөтүнэн иккистээн тупсарыллан тахсыбыта.
Эбэбит Елена Васильевналыын 4 оҕону төрөтөн, үлэһит дьон оҥортоон, атахтарыгар туруорбуттара. Улахан уоллара Максим аҕатын туйаҕын хатаран саха тылын учуутала, СР үөрэҕириитин туйгуна. Кэргэнэ Екатерина Ивановна начальнай кылаастар учууталларынан 30 сыл үлэлээн сынньалаҥҥа олорор. Кыыстара Марина парикмахер. Кыра уол Айталин ветеринарнай врач идэлээх, Тыа хаһаайыстыбатын туйгуна бэлиэлээх. Кэргэнэ Светлана Ильинична улэ уонна черчение учуутала идэлээх. Уолаттара: Айсен стоматолог, кэргэннээх оҕолоох. Булаат, Вася оскуола оҕолоро. Кыыһа Саара экономист, “Сахаэнерго”ҕа үлэлиир. Орто уола Кыдаан электрик идэлээх, кэргэнэ Ирина библиотекарь, билигин пенсионердар. Кыргыттара: Кира саха тылын учуутала идэлээх, перевод идэтигэр магистранныыр, кэргэннээх оҕолоох. Лена журналист идэлээх, оҕолоох.
Эһэбит Кириилэбис сырдык үтүө аатын умнубаппыт, кэриэстиибит.
Кира Шарина, Лена Ксенофонтова.
2020 сыл.
