Федорова Анна Егоровна от ыйын 25 күнүгэр 1930 сыллаахха Ленскэй оройуон Нам урочищетыгар Егор Иванович, Аграфена Егоровна Федоровтар диэн 6 оҕолоох дьиэ кэргэҥҥэ төрөөбүтэ. Төрөппүттэрэ “Партизан” колхозка үлэлииллэр этэ. Аҕата - колхоз бастыҥ булчута, төһүү үлэһитэ. Оччотооҕу оҕолор үлэтэ суох олорботторо. Анна колхозка хотон үлэтигэр, ынах-сүөһү иитиитигэр, от үлэтигэр оҕолору кытары көмөлөһөрө.
1941 сыллаахха бастакы хомуурга аҕатын, Егор ИвановиҺи, сэриигэ ыҥыраллар. Аграфена Егоровна алта эмдэй-сэмдэй оҕотун кытары бэйэтэ хаалар. Анна Күөбүргэн түөрт кылаастаах оскуолатыгар үөрэнэн баран, Орто-Наахара сэттэ кылаастаах оскуолатыгар үөрэнэр. Математикаҕа, алгебраҕа туйгуннук үөрэнэр, удумаҕалатар буолан, оҕолор үксүлэрэ киниттэн усталлар эбит. Оскуолаҕа үөрэнэ сырыттаҕына, аҕата суох буолбутун, сэрии толоонугар хорсуннук охтубутун туһунан туоһу сурук кэлэр. Сэрии кэмигэр Анна түөрт бииргэ төрөөбүттэрэ суох буолаллар. Алта оҕоттон быраата Дьөгүөрдүүн (Федоров Егор Егорович, 1940 сыллаахха төрөөбүт) хаалаллар. Анна оскуоланы бүтэрэн баран Мухтуйа оскуолатыгар ахсыс кылааска үөрэнэ киирэр. Ас-таҥас кырыымчык, огдообо хаалбыт ийэтэ соҕотоҕун кыаммат буолан, үөрэххэ дьулуурдаах кыысчааны ыҥыран ылар. Ити курдук Аҕа дойду сэриитин уот холоруга Анна дьиэ кэргэнигэр муҥу-сору көрдөрбүт, өлүүнү-сүтүүнү оҥорбут эбит.
Күөбүргэҥҥэ аймахтарыгар көһөн, үһүөн «Рабочай” колхозка үлэлииллэр. Манна үлэлии сылдьан 1952 сыллаахха сэрии бэтэрээнэ Кусатов Афанасий Дмитриевичка кэргэн тахсар. Афанасий Дмитриевич 1926 сыллаахха Дмитрий Николаевич (Миисэ оҕонньор) уонна Пелагея Григорьевна Кусатовтар диэн элбэх оҕолоох ыалга төрөөбүт.Уон кылаас үөрэхтээх Афанасий оччолорго «Рабочай” колхозка счетоводунан үлэлии сылдьыбыт. 1948 сыллаахха Магадан куоракка Горнай техникумҥа киирэ сатаабытын доруобуйата мөлтөх буолан ылбатахтар.
Эдэр ыаллар 1953 сыллаахха уоллаах кыыс игирэ оҕолоноллор. Оҕолор биир да сыл буолбакка, утуу-субуу ыалдьан суох буолаллар. 1955 сыллаахха уоллара Радик төрүүр. Эдэркээн Анна уол оҕолонон, иккиһин оҕо күүтэр буолан, икки игирэ оҕотун сүтэрбит аһыытын умнан иһэн, 1956 сыллаахха от ыйын сүүрбэ аҕыһыгар, кыыһа Рая күн сирин көрбүт күнүгэр, дьиэ кэргэн аҕа баһылыга Афанасий Дмитриевич иһинэн эмискэччи ыалдьан, Күөбүргэнтэн Орто-Наахараҕа айаннаан иһэн, муҥурдааҕа тэстэн, үрүҥ тыына быстар. Эдэр ыал аҕата ити курдук кыһыылаахтык, кыыһа төрөөбүт күнүгэр, кырачаанын көрбөккө даҕаны суорума суолланар. Анна Егоровна икки эмдэй-сэмдэй кырачаан оҕолорун кытары ийэтин курдук огдообо хаалан хаалар. Ол кэннэ кини иккистээн кэргэн тахсыбакка, оҕолорун атаҕар туруортуур, иитэн үөрэхтээх дьон оҥортуур туһугар олох ыарахаттарын кытары соҕотоҕун туруулаһар. Мухтуйаҕа киирэн медсестра курсугар үөрэнэр. Үөрэҕин бүтэрээт Орто-Наахараҕа көһөн, пенсияҕа тахсыар диэри балыыһаҕа медсестранан үлэлиир. Эйэҕэс, элэккэй майгылаах, куруутун күлэ-үөрэ сылдьар Анна Егоровнаны дьон олус сөбүлүүр, идэтигэр бэриниилээх буолан өрүү хайҕалга сылдьар.
Анна Егоровна кыыстаах уола үтүө дьон буола улааталлар. Уола Кусатов Радик Афанасьевич суоппар идэлээх. Армияттан кэлэн баран, Ленскэй куоракка Райпотребсоюзка суоппардыыр, ол кэннэ пенсияҕа тахсыар диэри Талакааҥҥа үлэлиир. Уоллаах кыыс оҕолоох. Кыыһа Кусатова Раиса Афанасьевна 1971 сыллаахха Орто Наахара 8 кылаастаах оскуолатын бүтэрэн баран, Ленскэй куорат төрдүс нүөмэрдээх оскуолатыгар үөрэнэр. 1973 сыллаахха Дьокуускайдааҕы медучилищеҕа санитар-биэссэр салаатыгар үөрэнэр. Идэтинэн үлэлии сылдьан, СГУ биолого-географическай факультетын бүтэрэн биолог идэтин баһылыыр. Ленскэй куорат санэпидстанциятыгар лаборатория сэбиэдиссэйинэн 2001 сыллаахха диэри үлэлээн баран, Дьокуускай куоракка көһөн, республикатааҕы санэпиднадзорга лаборант бырааһынан үлэлиир. Саха Республикатын Госсанэпидслужбатын бочуоттаах үлэһитэ. Анна Егоровна оҕолорун үөрэхтээн, сиэннэрин бүөбэйдэһэн баран, 2000 сыллаахха тохсунньу 24 күнүгэр суох буолбута.
