Винокурова Евдокия Афанасьевна (1939-1969) сэрии кэмин оҕото, тыыл ветерана. 1936 сыллаахха  Охооноһой (Лохсо) Мөлөкүүрэп   уонна Өлөөнө Тарасова дьиэ кэргэнигэр үһүс оҕонон күн сирин көрбүтэ. Бииргэ төрөөбүттэрэ: убайдара Тарас (1931 с.т.), Ким (1936 с.т.)Аҕатынан  эһэтэ  Мэхээлэ –Чооруос тимир ууһа эбитэ үһү. Былыргы олохторо – Былахы сирэ эбит. Мэхээлэ 2 уол, биир кыыс оҕоломмут. Винокуровтар билигин Сайдыынан, Чымынаайынан, Харбалааҕынан тэнийэн олороллор.Ийэтинэн эбээтэ Мотуруона, Сырдаабыттан төрүттээх Тарасовтар кыыстара. Түөрт бииргэ төрөөбүттэр. Соҕотох кыыһа Өлөөнө үс оҕоломмут.Евдокия «Сырдаабыт» колхуос биир үрдүк көрдөрүүлээх ыанньыксыта   этэ. Биир ынахтан үүтү ыаhыҥҥа 1959 с. – 1645 кг, 1961 с. – 1484 кг кирбиини ыла сылдьыбыта («Мэҥэ Алдан» 1 кинигэ, 102 стр.) Бастыҥ үлэтин иhин 1968 с. Кировабад куоракка сынньалаҥ дьиэтигэр күүлэйдээн кэлбитэ.«Сайын кыра сылдьан бары бииргэ оонньуур доҕотторум Агафья Мярина-Тарасова, Надежда Романовна Колодезникова (Сыромятникова), Евдокия Афанасьевна Винокурова, Марфа Васильевна Тарабукина (Аммосова), Клара Илларионовна Колодезникова.  Агашалаахха балтыбын илдьэ ыаллаах, Надеждалыын наар бэйэбит куукула оҥостон түннүккэ дьиэлэнэн оонньуурбут. Дунялыын биhиги ампаарбыт үрдүгэр кумаҕынан дьиэ-хотон туттан мас ынаҕынан оонньуурбут. Марфалыын эмиэ мас ынаҕынан оонньуур этибит. Агаша, Дуня, Надя, Клара,  Вячеслав Ковлеков, кини быраата Миша, Антон Тарасов, Николай Колодезников,  Ким Колодезников, Надежда Колодезникова буоламмыт сайынын хортуоппуй сыыhын ыраастыырбыт, көмөрбүт,  саас кирпииччэ үктүүрбүт. Сүрэҕэлдьээн наар аккаастанаары сор бөҕө буоларбыт, ону биригэдьиир Егор Петрович Колодезников (Бассабыык Дьөгүөр) олох мөхпөт, наар алы гынар : «Дьэ, оҕолоор, кытаатыҥ, үлэлээн иhиҥ, күһүн атыыга бардаҕына, хармааҥҥыт толору харчы буолуо, оччоҕо хобулуктаах түүппүлэ, саппыкы, шевиот көстүүм, солко ырбаахы буолуоххут. Ону санааҥ...»  - диирэ. Биhиги саҥата суох барарбыт уонна салгыы үлэлиирбит. Дуня Винокурова «ити кырдьык, күһүн харчы бөҕө буолар» диирэ. Улаатан баран сайын наар окко сылдьарым. Сайын устата 100 күн буолара» (А.С.Турчина ахтыыта, «Сырдаабыппыт – сырдык, сылаас өйдөбүлбүт» , -Дьокуускай, 2017, 201 стр.)  “Сүөһү үлэтигэр бастакы көлүөнэлэр Винокурова Елена (Өөҥкө), Аммосова Марфа, Колодезникова Анна Федоровна, Сыромятникова Матрена, Саввина Мария уо.д.а. ыанньыксытынан үлэлээбиттэрэ. Иккис көлүөнэ, кинилэр ыччаттара – Аммосова Домна Власьевна, Сыромятникова Евдокия Романовна, Атакова Прасковья Егоровна, Винокурова Евдокия Афанасьевна, Колодезникова Аграфена Титовна, Колодезникова Александра, Сыромятникова Марина Романовна, Колодезникова Анна эдэр саастарын үтүө кэмин биир күн өрөбүлэ, уоппуската суох хотоҥҥо атаарбыттара. Домна Власьевна – Ленин, Бочуот Знага уордьаннарынан наҕараадаламмыта, Евдокия Романовна САССР Верховнай Советын бочуотунай грамотатын ылбыта. Тарасова Анна Никитична сэрии сылларыгар хонуу үлэтин биригэдьииринэн, кэлин ыччат сүөһү көрүүтүгэр уһуннук үлэлээбитэ”.( П.Н.Тарасов ахтыыта, «Сырдаабыппыт – сырдык, сылаас өйдөбүлбүт» , -Дьокуускай, 2017, 71 стр.)“Колхоз үлэтэ баһаам: сүөһү көрүүтэ, от оттооһун, саас бачыап ыһыы, күһүн ону хомуйуу уонна паар. Хара сарсыардаттан киэһэ хараҥаҕа диэри эр дьон мастара-отторо, аны быһыт быһан балыктара. Дьэ барыта кытаанах илии үлэтэ. Утуктуу-утуктуу оҕус сиэтэҕин, буһа-буһа, аччыктыы-аччыктыы от үлэтэ. Күһүн тоҥо-тоҥо хортуоска хомуйуута.Кириэстэн кэлэн баран бастакы сүрэхтэниим, бачыап сир хорутуутугар, ыһыыга үлэлээбитим. Бачыап диэн күһүҥҥү хомуур кэнниттэн сааскы ыһыыга анаан сонуогу хорутуу, тиэрии. Онно булуукка икки оҕуһу көлүйэн баран сонуокка үлэлиигин. Хоту Өтөҕү, Илин Кытылы, Дьэрэлини сонуок оҥорон, бурдук ыһан, үүнүү бөҕөнү ылар этилэр. Сааскы суртка хортуоска, турнепс үүннэрэллэрэ.Арыый кыра сылдьан сыыс ыраастааһына, хотон хаарын түһэрии, от үлэтэ, булууктаах оҕуһу сиэтии, хортуоппуй, турнепс хостооһуна. Барыта оҕо үлэтэ, илии үлэтэ. Антон, мин, Надялар (Сыромятникова, Колодезникова), Дуня Винокурова, Клара Колодезникова, Агаша Тарасова (Мярина), Митэпиэй диэн уол баара.Биэс-алта паара булуук, иккилии оҕус, иккилии киһи үлэлиибит. (А.А.Колодезникова ахтыыта, «Сырдаабыппыт – сырдык, сылаас өйдөбүлбүт» , -Дьокуускай, 2017, 175 стр.) 

                                                                                                                                                                            Елена Винокурова