Стручкова Матрена Васильевна (1935- 2011).

(1935-2011)

«Ветеран тыла», «Кыайыы 60»,  «Кыайыы 65» юбилейнай мэтээллэр

            Мин Сэргэлээххэ Бүөр диэн сиргэ төрөөбүтүм.Ийэм Клепондина Анна Тимофеевна кэргэнэ эрдэ өлөн, түөрт оҕолоох огдообо хаалбыт. Убайым Гошаны таай Клеондин Иннокентий Тимофеевич, миигин эбэм Маарыйа ииттэ ылбыттар. Ийэм фермаҕа асчыт, сайын от үлэтигэр күүһэ кыайарынан мөхсөрө.. Олус аһыныгас дууһалааҕа, ураты минньигэс астааҕа, иистэнньит этэ.

            Биһиги «Сырдатыы» колхозтан уонча оҕо буолан үөрэнэ диэн акка мэҥэстиһэн кэлээччибит. Кэлиэхтэрин баҕарбакка,  ыҥыырга кэлгиллэн кэлэр уолаттар баар буолааччылар. Мин хараҕынан куһаҕаннык көрөр эбэм сайыһан ытыы хаалааччы. Биһигини барыбытын Хабдьы өтөҕөр биир балаҕаҥҥа биир көрөр киһилээх олордоллоро. Онно бэйэтэ куобахтанар Айаас эмээхсинэ чэйгэ эҥин атастаһа куобах кэһиилээх кэлээччи. Мин Хаачалыын (Горохова Екатерина Васильевна) аччыктаатахпытына, хаппыт куобах тириититтэн тумсун быһан ылан үтэн сиирбит. Дойдубутун наһаа ахтарбыт. Мин оҕо эрдэхпиттэн  харахпынан улаханнык мэһэйдэнэр этим, ол иһин маҥнайгы кылааска эрэ үөрэммитим.Оскуолабыт оччолорго биһиги көрдөхпүтүнэ, улахана, киэҥэ сүрдээх буолааччы уонна , кырам бэрт буолан эбитэ дуу, атын оҕолор эмиэ наһаа бөдөҥ буолааччылар. Мин оскуолаҕа барыахпын баҕарбаппыттан иистэнньэҥ Түмэппий диэн таайым тикпит таҥаһынан түөкэйдээн ыыта сатааччылар, ол иһин ырбаахылаах, сарапааннаах, болтуолаах буолааччыбын.Учууталым Монастырев Прокопий Лукич этэ. Мин наар ытыырбын өйдүүбүн. Ону учууталым: «Мин оруобуна маннык балтылаахпын»,-дии-дии, уоскутан, төбөбүттэн имэрийэрин өйдүүбүн. Оскуолаҕа лэппиэскэ өйүөлээх кэлэн, сүһүөҕүнэн кээмэйдээн дэлби торгуйдаһарбыт. Сорох эккэ атастаһар, ону сааһынан үллэтэрбит. Сорохтор быстыбат  эмиэрикэ үрүҥ бурдугуттан лэппиэскэлээх буолаллар, онно ымсыырыы бөҕө буолар.13 сааспыттан фермаҕа тас үлэтигэр сыстан көмө үлэһит этим. Суораттатан мустараллара, кыһын натуураҕа түҥэтэллэрэ. Күһүөрү бөһүөлэктэн көс курдук сиргэ турар Ыылаахха омурҕаҥҥа чэй кэһиилээх тиийдэхпинэ, кус биэрэн ыыталлара үчүгэй да буолааччы. Оҕуһунан уу тиэйэрим, кыһыҥҥы тымныыларга эҥэрим илийэн тоҥон хаалара. Айаас сиһиттэн мас тиэйэрим, күҥҥэ иккитэ эргийэрим.  Сэрии кэмигэр агитатордар сылдьан кэпсииллэрэ. Ийэм уолаттарбын илдьиэхтэрэ диэн куттанара. Кыайыы үөрүүтүгэр сүөгэйдээх үүт биэрбиттэрэ, арыынан барыбытыгар натуура үллэрбиттэрэ. Иискэ үөрэнэн, чугастааҕы дьоҥҥо сон тигэрим, куобах тириитэ имитэрим. Убай-абаҕа дьонум Баһылай, Христофор Потаповтар оҕолорун оҕолоон соччо аччыктаабатаҕым.  Билигин ыал ийэтэ, эбэтэ буолан, сиэннэрбин сүбэлээн-амалаан олоробун. Ыччаттарым айылҕа биэрбитинэн хомус, ырыа, үҥкүү дьарыктаахтар.

                                                                                                                                                                                                  2000 сыл

.