Андросов Поликарп Александрович. (1933-2009)

1933 сыллаахха ыам ыйын 13 күнүгэр Таатта оройуонун Баайаҕа нэһилиэгэр Марина Прокопьевна, Александр Николаевич Андросовтар дьиэ кэргэҥҥэ төрөөбүтэ. Дьонноро оҕолоро турбат буолан Мандаров Игнатий Нестеровичтаахха ииттэрэ биэрбиттэр. 14 оҕоттон 4 оҕо ордон киһи-хара буолбуттар. Хата ииппит дьоно араспаанньатын уларыттарбатахтар. Баайаҕа, Ытык Күөл оскуолаларыгар үөрэммитэ. Сэрии кэмигэр холкуоска былах быһыытыгар, фроҥҥа итии таҥаһы хомуйууга көмөлөспүтэ. 1957 сыллаахха СГУ саха салаатын бүтэрэн, үлэтин Абый улууһун Дружина оскуолатыттан саҕалаабыта. 1959-1996 сылларга Баайаҕа оскуолатыгар дириэктэр, саха тылын учуутала. 1973 сыллаахха биир бастакынан оҕо үлэтин уонна сынньалаҥын дьүөрэлээн от звенотугар лааҕыры тэрийбитэ. 1983 сыллаахха саха тылын уонна литературатын кэбиниэтэ республикаҕа үһүс миэстэни ылбыта. Кабинет уратытынан баай ис хоһоонноох фонотеката буолар. Баайаҕа нэһилиэгин историятын үөрэтиигэ республика национальнай архыыбыгар үгүстүк үлэлээбитэ, “Баайаҕа” кинигэ хос ааптара. Бииргэ төрөөбүттэр Марина Александровна, Ксения Александровна, Поликарп Александрович Андросовтар учуутал династияларын маҥнайгы көлүөнэ бэрэстэбиитэллэрэ. Балта Дария Александровна алмаас промышленноһын бэтэрээнэ, Дьокуускай куоракка олорор. П.А. Андросов РСФСР үөрэҕириитин туйгуна, Таатта улууһун уонна Баайаҕа нэһилиэгин бочуоттаах олохтооҕо. Кини олоҕун кэргэнэ Татьяна Игнатьевна, алта оҕолоро, үгүс сиэннэрэ салгыыллар.