В тылу ковали Победу

 
 
Годы жизни: 30.04.1928 – 05.06.2005

Петров Иннокентий Афанасьевич 1928 сыллаахха муус устар 30 күнүгэр күн сирин көрбүтэ.  Ньурба улууҺун Бордоӊ нэһилиэгин олохтооҕо, Үлэ, тыыл ветерана.

 Иннокентий Афанасьевич элбэх оҕолоох ыал оһоҕос түгэҕинээҕи оҕото этэ. Дьонноро өрүс уӊуор Күӊкүйгэ «Ат ыыппыт» алааҺыгар олорбуттара. Ийэлээх аҕата Чыычаахтан атыннык таптаан ааттаабат буоланнар, ол таптал аата үйэтигэр иӊэн хаалбыта.

Сэрии саҕаланан, биһиги аҕабыт оскуолаҕа ситэри үөрэммэтэх, 2 кылааһынан тохтуурга куһэллибит. Улахан убайдара үһүөн сэриигэ барбыттар. Дьон кыанар өттө сэриигэ ыӊырыллан, биһиги аҕабыт 14 сааһыттан хонуу биригэдьиирин ыарахан үлэтин дьарамай санныгар түҺэрэн үлэҕэ эриллэн барбыт. Кэлин ол сыллары ахтарыгар наар дьон үтүө көмөтунэн, сүбэтинэн сылдьыбытын махтана кэпсиирэ. Дьоно кырдьаҕас буоланнар наар үлэтин быыҺыгар бултаан, балыктаан ийэлээх аҕатын, эдьиийин аҺатара үһү. НаҺаа элбэхтик аччыктыылларын, сууккаҕа курууска аӊаара эпсээӊкэ хааҺыннан, быыкаайык лэппиэскэ тооромоҺунан хонон туралларын ахтара. Онон инчэҕэй тирбэҕэ быстыбатынан бу ыарахан сыллары аҺаран, Кыайыы үөрүүтүн этинэн – хаанынан билбит эбит.

Сэрии кэнниттэн хомуньуус баартыйатыгар чилиэнинэн киирэн үлэ инники күөнүгэр сылдьыбыт. Маалыкайга бастакы Ильич уота кэлэригэр дизелистээн, кыыл иитэр фермаҕа саҺыл иитиитин көҕүлээн бастакы кыыл иитээччи аатын сүкпүт. СаҺылларын балыктаан, бултаан аҺатаннар, биир ийэттэн элбэх оҕону ылары ситиспиттэрин бэркэ иэйэн олорон кэпсиирэ. Бу үрдүк көрдөрүүлэрин иҺин биир үлэҺиттэрин Петров Лука ВасильевиҺы Москва куоракка ВДНХ быыстапкатыгар барарын ситиспиттэр. Колхоз, совхоз кадровай булчутунан өр сылларга үлэлээн элбэх күндү түүлээҕи дойдуга туттарбыт сорсуннаах сонордьут, баай барыылаах маанылаабыт булчута этэ. Бочуоттаах сынньалаӊӊа тахсыар диэри харабынайынан, онно да сүгүн олорбокко олохтоох балыыҺаҕа рабочайынан өр сылларга үлэлээбитэ.

 Сэрии сылларыгар, кэннигэр утуө суобастаах үлэтин иһин кини элбэх наҕараадалардаах, Улэ, тыыл ветерана, Бордоӊ нэҺилиэгин бочуоттаах олохтооҕо этэ.

Ийэбитин, Саввинова Изабелла Андреевнаны кэргэн ылан уон оҕону төрөтөн, иитэн, үөрэттэрэн киһи гынан, билигин Чыычаах оҕолоро, сиэннэрэ, хос сиэннэрэ Сахабыт сирин араас муннуктарыгар үлэлии-хамсыы, айа-тута сылдьаллар. Төһө даҕаны аҕыйах кылаас үөрэхтэннэр аҕабыт үөрэҕи, билиини өрө туппут киэӊ билиилээх киьи этэ, кини ыйыытынан  биэс оҕото учуутал идэтин баҺылаан, атыттарбыт эмиэ үлэни өрө туппут үтүө дьон буоланнар, оҕолонон – урууланан олороллор.

Аҕаа, ЭҺээ биҺиги Эйигиннэн киэн туттабыт, куруук саныыбыт-ахтабыт!!

Суруйда кыра уола Петров И.И., МБУөТ «Саха гимназия» алын кылаастарын учуутала. Дьокуускай куорат, ыам ыйа, 2020 сыл.

Место рождения: Нюрбинский улус, Бордонский наслег
ПОДЕЛИТЬСЯ СТРАНИЦЕЙ