В тылу ковали Победу

 
 
Годы жизни: 10.1931 – 12.05.2014

Саввинова Изабелла Андреевна 1931 сыллаахха алтынньыга күн сирин көрбүт. Ньурба улууҺун Бордоӊ нэһилиэгин олохтооҕо, Үлэ, тыыл ветерана, Герой ийэ.

Биһиги ийэбит Изабелла Андреевна Саввинова элбэх оҕолоох дьиэ кэргэӊӊэ төрөөбүтэ. Аҕата Андрей Андреевич Саввинов көмүс тарбахтаах уус эбит, ийэтэ Лыткина Евдокия Прокопьевна сүөҺу көрөөччүннэн үлээлии-үлэлии оҕолорун көрөр-истэр эбит. Сэрии ыар сылларын аҕалара үлэһит бэрдэ, сатабыллаах уус буолан этэӊӊэ аҺарбыттар.

Биһиги ийэбит олох эдэр сааҺыттан колхуос, сопхуос араас үлэтигэр сыстан: саҺыл ферматыгар асчыттаан, ыанньыксыттаан, ньиэптэҕэ харабынайдаан, дьыссаакка хачыгаардаан, балыыҺаҕа повардаан, үлэттэн туора турбат туруу үлэҺит этэ. Минньигэстик астыырын таҺынан, иистэнэрэ, баайара, сайын окко кыраабылын ыҺыктыбакка тура тэбинэн оту мунньар түргэн- тарҕан туттунуулаах отчут бэрдэ этэ.

Сэрии сыллара мэҺэйдээн түөрт кылаас үөрэҕинэн тохтоон хааллар даҕаны, хара өлүөр дылы сахалыы кинигэни кыӊастаьан ааҕар, хаҺыаты туппутунан сылдьар, сүрдээх олохтоох тыллаах үчүгэй суруксут этэ. Бэрт элбэх сэһэннээҕэ, көрү-күлүүнү наҺаа сөбүлүүрэ, сороҕор оһуохайдыыра, таһаараа ыал оҕолорун мунньан мааркалыыр буолара. Аҕалаах ийэбит оҕолорун бэрт кыраларыттан батыһыннартыы сылдьан хара үлэҕэ сыһыаран, атын даҕаны үлэҺиттэргэ көмө-ньыма буоларга бэйэлэрин холобурдарын көрдөрөн, дьоӊӊо-сэргэҕэ, ордук бииргэ төрөөбүттэригэр, аймахтарыгар наҺаа чугас ураты истиӊ сыҺыаннаахтарын биллэрэн, биҺигини оннук иитэн улаатыннартаабыттара.

Ийэбит Изабелла Андреевна аҕабытыгар Иннокентий Афанасьевич Петровка кэргэн тахсан, уон оҕону төрөтөн, атахпытыгар туруортаан, үөрэхтээх үлэҺит дьон оӊортоон, элбэх сиэн, хос сиэн тапталлаах эбээтэ буолан сирдээҕи дьолу толору билбититтэн биһиги олус үөрэбит, ийэбитигэр тапталбыт, махталбыт муӊура суох. 

Ийээ, Эбээ биһиги Эйигиннэн киэн туттабыт, куруук саныыбыт-ахтабыт!!

 

Суруйда кыра уола Петров И.И., МБУөТ «Саха гимназия» алын кылаастарын учуутала. Дьокуускай куорат, ыам ыйа, 2020 сыл.

Место рождения: Нюрбинский улус, Бордонский наслег
ПОДЕЛИТЬСЯ СТРАНИЦЕЙ