Вдовы воинов-фронтовиков

 
 
Годы жизни: 1926 г.

Кыайыы күнүгэр төрөөбүт дьоллоох кырдьаҕас

Копылова Агафья Егоровна – үлэ, тыыл ветерана, сэрии кыттыылааҕын огдообото, 93 саастаах, Ньурба куоратыгар олорор.

Агафья Егоровна Копылова ыам ыйын 9 күнүгэр 1926 сыллаахха Токос нэһилиэгэр колхуостаах дьиэ кэргэнигэр 4 оҕонон төрөөбүтэ. Оскуолаҕа үөрэнэн 7 кылааһы бүтэрбитэ. Сэрии саҕаланыыта 15-16 саастаах кыыс колхуоска үлэтин саҕалаабыта. Маҕаһыыҥҥа бэрэдэбиэһинэн, ааҕар балаҕаҥҥа, сэбиэткэ сэкирэтээринэн үлэлээбитэ.

Аччык дьыллар ыарахаттарын этинэн-хаанынан билбитэ. Кини кэпсииринэн, хоргуйуу кэмэ 3 сыл устата буолбута. Бу ыар кэмнэргэ кинилэр балыктаан, бултаан, кутуйах хаһааһын көрдөөн булан, арыт турааҕы бултаан үссэнэн арыычча туораабыттар эбит. Үгүс элбэх дьон, ыал ыалынан хоргуйан өлбүттэрэ, диир. Оннооҕор, уонча сүөһүнү сиэбит ыал син биир өлөөхтөөбүттэрэ, диэн кэпсиир.

Сэрии кэнниттэн, ферма сэбиэдиссэйинэн ананан ситиһиилээхтик үлэлээбитэ. Олус бэриниилээх, кыһаллыгас, бэрээдэктээх диэн куруук хайганарын саастыылаахтара кэпсииллэрэ. Дьокуускай куоракка колхуос бэрэссэдээтэллэрин бэлэмниир оскуоланы туйгуннук үөрэнэн бүтэрбитэ. 1954 сыллаахха биһиги аҕабыт Копылов Егор Егоровичтыын холбоһон ыал буолаллар. Егор Егорович 1945 сыллаахха 18 сааһын туолаат, Сэбиэскэй Аармыйа кэккэтигэр сулууспалыы баран Дьоппуон сэриитигэр кыттар, ол кэннэ салгыы  хаалан, уопсайа 9 сыл устата сулууспалаан, дойдутугар 1954 сыллаахха эргиллэн дьэ кэлэр.

Эдэрдэр дьиҥнээх тапталларын 9 сыл устата бүөбэйдээн, харыстаан илдьэ сылдьыбыттара элбэх дьону сөхтөрөр. Егор Егорович радист идэлээх буолан кинилэр Ньурбаҕа көһөн киирэн олохсуйбуттара. Утуу субуу икки кыыс, икки уол оҕоломмуттар.

Агафья Егоровна Ньурбаҕа киириэҕиттэн бочуоттаах сынньалаҥҥа тахсыар дылы Ньурбатааҕы промкомбинат, онтон быткомбинат тэрилтэлэригэр эҥкилэ суох үчүгэйдик үлэлээбитэ. Тэрилтэ парткомун сэкэрэтээринэн, идэлээх союз кэмитиэтин бэрэссэдээтэлинэн талыллан, уһуннук норуотун иннигэр эҥкилэ суох сулууспалаабытын, элбэх ахсааннаах бочуотунай грамоталара, мэтээллэрэ туоһулууллар.

Аҕабыт авиапорт тэрилтэтигэр метеостанцияҕа радиһынан, сопхуоһунан ситиһиилээхтик үлэлии сылдьан, эрдэ 45 сааһыгар бу дойдуттан оһолго түбэһэн бараахтаабыта. Салгыы ийэбит собус-соҕотоҕун 4 оҕолорун атахтарыгар туруортаабыта. Улахан кыыс Раиса Егоровна, улахан уол Егор Егорович быткомбинат бэтэрээннэрэ, кыра уол Андрей Егорович урбаанньыт, кыра кыыс Людмила Егоровна учуутал идэлээх. Билигин бэйэлэрэ бочуоттаах сынньалаҥҥа олорор биэнсийэниэрдэр.

Агафья Егоровна быйыл ыам ыйын 9 күнүгэр Кыайыы 75 сыллаах үбүлүөйүгэр 94 сааһын туолуо. Кини түөрт оҕо ийэтэ, тоҕус оҕо эбээтэ, 14 оҕо хос эбээтэ буолан ньир бааччы олорор. Оҕолордооҕун билэн, улахан кыыһын дьиэ кэргэнигэр кырдьар сааһыгар сылаастык сымнаҕастык хараллан олорор, уруккуну-хойуккуну эндэппэккэ, барытын өйдүү-саныы, кэпсии-ипсии олорор.

ПОДЕЛИТЬСЯ СТРАНИЦЕЙ